ଜୀବନ ଯୁଦ୍ଧେ ହାରିଲି

ହରଣ ଫେଡାଣ ,ମିଶାଣ ,ଗୁଣନ

ଗଣିତର ଚାରି ସୂତ୍ର,

ଗଣିତ ପ୍ରଶ୍ନର ଉତ୍ତର ପାଇଁକି

ବିଦ୍ୟମାନ ସେ ସର୍ବତ୍ର ।

ମଣିଷ ଜୀବନେ ଗଣିତ କଷାଟି

ସଦାବେଳେ ଚାଲିଥାଏ,

ଚାରି ସୂତ୍ରଧାରା ଆବଶ୍ୟକବେଳେ

ପ୍ରୟୋଗ ସେ କରିଥାଏ ।

ସୂର୍ଯ୍ୟ ଉଦୟରୁ ଅସ୍ତ ହେବାଯାଏ

ହାଟଟିଏ ବସିଥାଏ,

ରଜନୀ ରାଣୀର କୋଳେ ଆଶ୍ରାନେଇ

ହିସାବ ସେ କରିଥାଏ ।

କେତେ ହରାଇଲା କେତେ ସେ ପାଇଲା

ଅଙ୍କଟିଏ କଷୁଥାଏ,

ଅଙ୍କ କଷୁ କଷୁ ନିଦ୍ରା ଦେବୀ କୋଳେ

ବିଶ୍ରାମ ସେ ନେଇଯାଏ ।

ମୁଦ୍ରିତ ନୟନେ ସପନ ରାଇଜେ

ସ୍ୱପ୍ନ ସୌଦାଗର ଆସେ,

ପରୀକ୍ଷାର ବେଳ ଘନେଇ ଆସୁଛି

ବସି କହେ ତାର ପାଶେ ।

କଠିନ,ସରଳ କିପରି ପରୀକ୍ଷା

ତା ଜୀବନେ ଯେ ଆସିବ,

ଚାରି ସୂତ୍ର ମଧ୍ୟୁକାହାକୁ ନେଇସେ

ଉତ୍ତୀର୍ଣ୍ଣ ହୋଇ ପାରିବ ।

ପ୍ରତ୍ୟେକ ଦିନର ହିସାବକୁ ଯିଏ

ଜୀବନରେ କରିଥାଏ,

ଭୂଲ ଠିକ୍ ସବୁ ଜାଣିନେଇସିଏ

ବିଭୁଙ୍କୁ ସମର୍ପି ଦିଏ ।

ଦିନ,ଦଣ୍ଡ,ମାସ,ବରଷଆସଇ

ପରୀକ୍ଷାର ବେଳ ଆସେ,

ସମସ୍ତ ପ୍ରଶ୍ନର ଉତ୍ତର ଦେବାକୁ

କଲମ ଧରି ସେ ବସେ ।

ପ୍ରତ୍ୟକ ଦିନର ମୂଲ୍ୟାୟନ ଖାତା

ପୃଷ୍ଠାକୁ ଆଢେଇଦିଏ,

ଶେଷ ପରୀକ୍ଷାର ଉତ୍ତରଟି ସିଏ

ବାହାର କରିଣ ନିଏ ।

ନିଜ ଜୀବନର ସମସ୍ତ ଦାୟିତ୍ୱ

ବିଭୁଙ୍କୁ ସମର୍ପିଥାଏ,

ତଥାପି ପରୀକ୍ଷା ଦେବାପାଇଁ ପଡେ

ହାରା ଜିତା ଚାଲିଥାଏ ।

ଚାରି ସୂତ୍ରଧାରା ଜଣାଥିଲେ ମଧ୍ୟ

ଷେଷରେ ସେ ହାରିଯାଏ,

ଜୀବନ ଯୁଦ୍ଧ୍ୟରେ ହାରିଯିବାପରେ

ପରୀକ୍ଷାର ଅନ୍ତ ହୁଏ ।

ବଞ୍ଚିବା ମରିବା ସମାନ ତାପାଇଁ

ହିସାବକୁ ଘୁଣିହେଲା,

ଜୀବନ ଦୀପଟି ଲିଭିବା ବାଟକୁ

ଅପେକ୍ଷା କରି ରହିଲା ।