ବାରଦିନେ ଶେଷ ହେବ

ଚାଲିବାକୁ ଅଛି

ପଥ ବହୁ ଦୂର

ପଡିବିନି କେବେ ଥକି ।

ନାରୀ ରୂପେ ମୁହିଁ

ଜନମ ନେଇଛି

ପରୀକ୍ଷା ଅଛି ମୋ ବାକି ।

ଜୀବନେ ଅନ୍ଧାର

କରିବି ମୁଁ ଦୂର

ମନରେ ସଂକଳ୍ପ ନେଇ ।

ମାନସିକ ସୁଖେ

ସୁଖୀ ହୋଇମୁହିଁ

ଜୀବନ ଦେବି ବିତାଇ ।

ନାରୀ ହୋଇବି କି

ନାରାୟଣୀ ହେବି

ସମୟ ଇଶାରା ଦେବ ।

ଜୀବନ ସଂଗ୍ରାମେ

ଯବାନ ସାଜିବି

ଧୈର୍ଯ୍ୟ ମୋ' ଅସ୍ତ୍ର ହୋଇବ ।

ଶାନ୍ତି ଓ ସନ୍ତୋଷ

ଏହି ଦୁଇ ମନ୍ତ୍ର

ଜୀବନେ ବ୍ରତ କରିବି ।

ଝଡ଼ ତୋଫାନକୁ

ରହିବନି ଡର

ଅକ୍ଳେଶରେ ବର୍ତ୍ତିଯିବି ।

ଦେହ ମୋ' ସଳିତା

ଧୈର୍ଯ୍ୟ ସହିଷ୍ଣୁତା

ସଂଯମତା ଆଚରିବି ।

ଜଟିଳ ପରୀକ୍ଷା

ସରଳ ହୋଇବ

ମୂଲ୍ୟାୟନେ ନ ହାରିବି ।

କାହାର ଆଶ୍ରୟ

ନେବି ନାହିଁ କେବେ

ନିରାଶ୍ରୟା ମୁହିଁ ନୁହେଁ ।

ଆତ୍ମସନ୍ତୋଷରେ

ଦିନ ବିତାଇଣ

ବିଜୟୀ ହେବାକୁ ଚାହେଁ ।

ସମୟ ସୁଅରେ

ଭାସି ଯାଉଥିବି,

ସଂଘର୍ଷ ମୋ' ଚାଲିଥିବ ।

ଠିକଣା ଜାଗାରେ

ପହଁଞ୍ଚିବି ଯାଇ

ମୋ' କର୍ମ ମୋ' ସାଥେ ଥିବ ।

ଜୀବନ ନାଟକେ

ଶେଷ ଜବନୀକା

ଅନ୍ତିମ ଦୃଶ୍ୟ ଆସିବ ।

ସବୁ ଅଭିନୟ

ସେଦିନ ସରିବ

ଆତ୍ମା ମୋ' ଶାନ୍ତି ଲଭିବ ।

ରକ୍ତ ମାଂସ ଦେହ

ପାଉଁଶ ହୋଇବ

କିଛି ଦିନ ନାମ ଥିବ ।

ଭଲ ମନ୍ଦ କିଛି

ବାରତା ବି ଦେବେ

ବାର ଦିନେ ଶେଷ ହେବ ।