ଜୀବନ ବୋଧ

ଜଣା ଅଜଣା ଏ ଜୀବନର ଗତି 

ବୁଝା ଅବୁଝାର ଖେଳ 

ଆଶା ଅବଶୋଷ ହସରେ ଲୁହରେ 

ରତ ହୁଏ ଏଠି ବେଳ l

କେବେ କେବେ ଏଇ ଜୀବନ ଅଙ୍ଗନ 

ସୁରଭିରେ ଯାଏ ଭରି 

କେବେ କେବେ ପୁଣି ଦୁଃଖ ହତାଶରେ 

ଖୁସି ସବୁ ଯାଏ ମରି l

ପରିସ୍ଥିତି କେବେ ପରିହାସ ସ୍ଵରେ 

ଜୀବନରେ ଆଣେ ବ୍ୟଥା 

ନୀରବ ଭାବନା ଚାପି ଦିଏ କେତେ 

ମନର ଅନ୍ତର କଥା l

ପାଇବାର ଆଶା ନିରାଶା ନାହିଁରେ 

ହୋଇଯାଏ ଅଭିଶାପ 

ଅଧିକାର ଏଠି ଧିକ୍କାର ଶବଦେ 

ଭରିଦିଏ ଅନୁତାପ l

ଜନ୍ମ ଆଉ ମୃତ୍ୟୁ ବୃତ୍ତ ପରିଧିରେ 

କର୍ମର ଗୋଲକ ଧନ୍ଦା 

କାମନା ବାସନା ବନ୍ଧନ ରଜ୍ଜୁରେ 

ଜୀବନଟା ଏଠି ବନ୍ଧା l

କେବେ କେବେ ପୁଣି ବୈରାଗ୍ୟ ବିତୃଷ୍ନା 

କରିଦିଏ ମୋହ ଭଙ୍ଗ 

ଜୀବନ ବିନ୍ୟାସ ଲଭଇ ସନ୍ୟାସ 

ଛାଡଇ ସଂସାର ସଙ୍ଗ l

ଆଶା ଅଭିଳାଷ ଛିଣ୍ଡାଇଣ ଫାଶ 

ନୀରବେ ଯାଆନ୍ତି ଉଡି 

କେବେ ଏ ଜୀବନ ଲଭଇ ସାର୍ଥକ 

ସଫଳତା ଶିଡ଼ି ଚଢି l

ଅସରନ୍ତି ଆଶା ନା ଅଛି ଭରସା 

ପରାଣ ପକ୍ଷୀକୁ ଏଠି 

ଯିବ ଦୂରେ ଉଡି ନିଜ ବାସ ଛାଡି 

ଛାଡି ସବୁ କୁଟା କାଠି l

ସ୍ମୃତି ଅନୁଭୂତି ଏ ଜୀବନେ ନିତି 

ଅତୀତକୁ ଆଣେ ଟାଣି 

କେବେ କେବେ ପୁଣି ଭାବପ୍ରବଣରେ 

ନିଜକୁ ପାରେନି ଜାଣି l

ତଥାପି ଜୀବନ ସ୍ବପ୍ନ ପଲ୍ଲବରେ 

ଅଚିରେ ଚାଲିଛି ଏଠି 

ସତ୍ୟ ଅସତ୍ୟର ଧର୍ମ ଅଧର୍ମର 

ବିଚାରରେ ମାଠିମୁଠି l