ଗଉରୀ ପୁତ୍ର ମହା ବିନାୟକ • ପ୍ରଫୁଲ୍ଲ ଚନ୍ଦ୍ର ମିଶ୍ର

ଜୟ ଗଜାନନ ଗଉରୀ ନନ୍ଦନ 

ତୁମକୁ ଅଭିନନ୍ଦନ,

ଜଣାଏ ଅଧମ ଆସି ଧରାଧାମ

ନାଶ କର ହେ ଅଜ୍ଞାନ;

ଦିଅ ବାରେ ଦରଶନ,

ତବ ଆଗମନେ ଧନ୍ୟ ହେଉ ଧରା

ପବିତ୍ର ହେଊ ଜୀବନ;

ଜୟ ଗଜାନନ ...।।

ଆହେ ବିଘ୍ନ ରାଜ ତୁମେ ଅଗ୍ରପୂଜ୍ୟ 

କୋଟି ସୂର୍ଯ୍ୟ କାନ୍ତି ପ୍ରଭା,

ମୋ ମନ ମନ୍ଦିରେ ଆସହେ ଠାକୁରେ

ରାଜି ଉଠୁ ବର୍ଣ୍ଣ ବିଭା; 

ମୋ ହୃଦୟ ସିଂହାସନ,

ଖାଲି ପଡିଅଛି ଆତୁରେ ଡାକୁଛି

ଅଜ୍ଞାନ କରି ମର୍ଦ୍ଦନ;

ଜୟ ଗଜାନନ ...।।

ଅଜ୍ଞାନ ଅନ୍ଧାର କର ହେ ଉଦ୍ଧାର 

ତୁମେ ପରା ଜ୍ଞାନ ଦାତା,

ତବ ମହୋତ୍ସବେ ଆଜିର ଉତ୍ସବେ

ଭରି ଯାଉ ପୁଲକତା;

ଭୂଧର ହେଉ ପାବନ,

ଗାଇ ତୁମ ନାମ ଗଗନ ପବନ

କରୁ ସର୍ବତ୍ର ଆଛନ୍ନ;

ଜୟ ଗଜାନନ...।।

ନାହିଁ ଅନ୍ୟ ଗତି ଆହେ ଗଣପତି

ବିଘ୍ନ ହର ହେ ଝଟତି,

ଆଜିର ଦୁର୍ଗତି ସଂସାର ବିପତ୍ତି 

ଯେତେ ଅନୀତି ଦୁର୍ନୀତି;

କରିବା ପାଇଁ ମୋତନ,

ଜଣାଣ କରୁଛି ଅଧମ ପ୍ରଫୁଲ୍ଲ 

ଦିଅ ଆସି ଦରଶନ;

ଜୟ ଗଜାନନ...।।