# ଜହ୍ନ ରାତି #

ସୁନେଲି ସଞ୍ଜରେ ଆସିଥିଲା ପ୍ରିୟା

   ପ୍ରୀତିର ପରଶ ନେଇ

ଫିକା ଫିକା ଏହି ଜହ୍ନ ଆଲୁଅରେ  

  ମନକୁ ନେଲା ଚୋରାଇ ।।

ତାରାଙ୍କ ମେଳରେ ଖେଳି ବୁଲୁଥିଲୁ

   ହାତ ଧରାଧରି ହୋଇ

ଜହ୍ନ ରାତି ଥିଲା ଆମ ପ୍ରେମ ସାକ୍ଷୀ

   ଜୋଛନା ଆପ୍ଲୁତେ ରହି ।।

ଶଶୀ ତାରା ସହ ଲୁଚକାଳି ଖେଳେ 

   ମନ ହେଉଥିଲା ବାଇ 

କୁଞ୍ଜବନେ ସେଇ ଛାଇ ଆଲୁଅକୁ

   କେମିତି ଭୁଲିବି ମୁହିଁ ।।

ସକାଳର ସାଥିରେ ହଜି ଯାଏ ଜହ୍ନ

   ରାତି ପାଇଁ କଥା ଦେଇ

ସୂର୍ଯ୍ୟାଲୋକେ ସିନା ନିଶା ସରିଯାଏ

   ଜହ୍ନ କଥା ଭୁଲେ ନାହିଁ ।।

ସପନରେ ଭରା ଅଭୁଲା ବେଳା ଯେ

   ରହିଛି ତା ବାଟ ଚାହିଁ  

ଜହ୍ନ ହଜିଲେ ବି ମନ ହଜେ ନାହିଁ 

   ସେପାଇଁ ବିଳାପ କାହିଁ ।।

ମନେପଡେ ମୋର ପିଲାବେଳ କଥା

    ଜହ୍ନ ରାତି ବନ୍ଧୁ ସହି

ମାଆ ମୋର ଖୁଆନ୍ତି ଆ ଜହ୍ନମାମୁଁ 

    ସରଗର ଶଶୀ କହି ।।

ଜହ୍ନ ରାତି ପ୍ରାଣେ ସଞ୍ଚରିତ କରେ

    ଅନେକ କଳ୍ପନା ଭାଇ

ଆଶାର ଆଲୋକ ଦେଖାଦିଏ ଆଗେ

    ଜୀବନ ବଞ୍ଚିବା ପାଇଁ ।।