ପଞ୍ଚୁକ ଦିନଚର୍ଯ୍ୟା

ସକାଳୁ ସକାଳୁ ଦାଣ୍ଡ ଓଳାଇଲୁ

ଗାଧୋଇଲୁ ମୁଣ୍ଡଧୋଇ

ଧୋବଲୁଗା ପିନ୍ଧି ପବିତ୍ର ମନରେ

ବସିଗଲୁ ସଜହୋଇ I

ପଞ୍ଚ ମୂରୁଜରେ ଚଉରା ମୂଳରେ

ଆଙ୍କି ରାଧାକୃଷ୍ଣ ରୂପ

ପୂଜା ଅରପିଲୁ ଜଗତନାଥଙ୍କୁ

ଜାଳିଦେଇ ଘିଅ ଦୀପ I

ଶୁଦ୍ଧପୂତ ହୋଇ ହବିଷ୍ୟ ରାନ୍ଧୁଛୁ

ଗୋଟିଏ ବକତ ଖାଇ

ପଞ୍ଚୁକ ପାଳନ କରୁଛୁ ଲୋ ସଖୀ 

କୃଷ୍ଣନାମ ମନେ ଧ୍ୟାୟୀ I

ସଞ୍ଜ ହେଲେ ସଖୀ ସଞ୍ଜବତୀ ଜାଳି

ପ୍ରଣମୁଛୁ ବୃନ୍ଦାବତୀ

ଧୂପ ମହକରେ ମହକାଉ ପ୍ରାଣ

ମନରେ ଜଗାଉ ଭକ୍ତି I

ତୋ ଆକାଶଦୀପ ମିଞ୍ଜି ମିଞ୍ଜି ଜଳେ

ଶୀତ ଥରାଉଛି ଦେହ

ତୋଫା ତୋଫା ଦିଶେ ଜହ୍ନର ଆଲୁଅ

ଅନ୍ଧାର ଲୁଚାଏ ମୁହଁ I

ଶ୍ରୀରାଧା ଶ୍ରୀକୃଷ୍ଣ ଯୁଗଳ ମୂରତି

ପାଦେ ରଖିବା ଲୋ ଲୟ

ପ୍ରାର୍ଥନା କରିବା ରାଧା ଦାମୋଦର

ମନରୁ କଟିବ ଭୟ I