ଜଗତରେ କେଉଁମାନେ ଦୁଃଖ ପାଆନ୍ତି

କୋଟି ଜନମର ତପସ୍ୟା ଫଳରେ 

           ପାଇଲ ମନ୍ୟୁଷ ଜନମ, 

ସେହି ଜନମର ସାର୍ଥକ କରିଣ 

          ମାନିବ ପ୍ରକୃତି ନିୟମ "

ପ୍ରକୃତି ନିୟମ ମାନିଣ ଚଳିଲେ 

          ଜଗତେ ଖୁସିରେ ରହିବ, 

ପ୍ରକୃତି ଦାନ ଯେ କରିଛି ଆମକୁ 

          ଅସରନ୍ତି ଯେ ବିଭବ "

ପ୍ରକୃତି କୋଳରେ ଛୋଟରୁ ବଢ଼ଇ 

          ତାରି ପାଣି ପବନ ଖାଇ, 

ପ୍ରକୃତିର ଦାନ ଅସରନ୍ତି ଦାନ 

          ରଖିବା ଯତନେ ଅଟଇ "

ଶ୍ରେଷ୍ଠ ଜୀବ ବୋଲି ସ୍ୱୀକୃତି ପାଇଲୁ 

           ସୃଷ୍ଟିକର୍ତ୍ତା ବ୍ରହ୍ମାଙ୍କ ଠାରୁ, 

ତଥାପି ଅନ୍ୟାୟ କରୁଛୁ ଜଗତେ 

           କାର୍ଯ୍ୟରେ ଅବହେଳା କରୁ "

ଆୟ ଠାରୁ ବ୍ୟୟ ଅଧିକ କରନି 

           ପାଇବ ଜୀବନରେ ଦୁଃଖ, 

ଋଣ କରିଥିଲେ ଶୀଘ୍ର ଯେ ସୁଝିବ 

           ଟିକିନିଖି ହିସାବ ରଖ "

ସମାଜର ନୀତି ନିୟମ ମାନିଣ 

           ଚାଲୁଥିବ ସଦା ଯେ ସର୍ବଦା, 

ଅପକର୍ମ ଠାରୁ ଦୁରେଇ ରହିବ 

           ଥାଅ ସତ କର୍ମରେ ସର୍ବଦା "

କେବେ ଭାରସାମ୍ୟ ହରାଅ ନାହିଁ ହେ 

            ଯେତେ ବାଧାବିଘ୍ନ ଆସୁ, 

ସୁସ୍ଥ ମନରେ ଯେ ସମାଧାନ କର 

           ଜୀବନରେ ହସ ଯେ ଆସୁ "

କାମ, କ୍ରୋଧ, ମୋହ ଲୋଭ ବଶବର୍ତ୍ତୀ 

           ହୁଅ ନାହିଁ ଜୀବନରେ,

ନିଜର ସ୍ୱାଧୀନ ହରାଅନି କେବେ 

           ବିଚାର କରି ବିବେକରେ "

ଛୋଟ ପିଲାମାନେ ଅବାଧ୍ୟ ହୁଅନ୍ତି 

     .      ରାଗିବ ନାହିଁ ଜୀବନରେ 

ସ୍ନେହ ଶ୍ରଦ୍ଧା ଦେଇ ବୁଝାଇଣ ଦେବ 

           ରଖିବ ତାକୁ ଯତନରେ "

ଆଜିର ବାଳକ କାଲି ନାଗରିକ 

          ଦେଶର ଅଟେ ଭବିଷ୍ୟତ, 

ଯତନ କରିଲେ ରତନ ମିଳିବ 

         ମନ ହେବ ହେ ପୁଲକିତ "

ଜାତିର ମଙ୍ଗଳ ଚିନ୍ତିଣ ମନରେ 

          କରୁଥିବ ସଦା ସର୍ବଦା, 

ତଥାପି ସମାଜେ ଶତ୍ରୁ ବାହାରିବେ 

          ଦୃଢ଼ ରଖିବ ମନ ସଦା "

ଯାହାର ଜୀବନେ ସଦାଯେ ସର୍ବଦା 

           ଅସୁବିଧା ଲାଗି ରହେ, 

ଡରି ନଯାଇଣ ମନ ଦୃଢ଼ କରି 

         ପ୍ରଭୁଙ୍କୁ ସ୍ମରଣ କର ହେ "

କପାଳ ଲିଖନ କେ କରିବ ଆନ 

         ଯାହାଥିବ କପାଳରେ, 

ବିପଦ ବେଳରେ କାତର ନହୋଇ 

         ରହିଥିବ ସାବଧାନରେ "

ଅନ୍ୟର ଭଲକୁ ସୁଦୃଷ୍ଟିରେ ଦେଖ 

        ତାର ଭଲ ଯେ ଚିନ୍ତା କରି, 

ପରର ଅନିଷ୍ଟ କରନି ଜୀବନେ 

        ମନରେ ପ୍ରଭୁଙ୍କୁ ସୁମରି "

ଅତୀତର କଥା ନଭାବି ମନରେ 

         ବର୍ତ୍ତମାନର କଥା ଦେଖ, 

ଭବିଷ୍ୟତ କଥା ଚିନ୍ତା ଯେ କରିଣ 

         ମନରେ ସାଇତି ହିଁ ରଖ "

ମନ୍ୟୁଷ ଜୀବନ ନୁହଇଁ କେବଳ 

         ଦିନେ ଦୁଇଦିନ କାଳର, 

ସତକର୍ମ କରି ବଂଚିବ ଜୀବନେ

          ହେବ ନାହିଁ କେବେ କାତର "

ବସିଣ ଖାଇଲେ ନଈ ବାଲି ସରେ 

          କହନ୍ତି ଯେ ମହାପୁରୁଷ, 

ବସି ଖାଇବାକୁ ପରିତ୍ୟାଗ କର 

          ନିଜକୁ ରଖିଣ ବିଶ୍ୱାସ "

କରମ ଅଟଇ ନିଜର ଯେ ଗୁରୁ 

          କର୍ମରେ ଥିବ ଯେ ସୁକର୍ମ, 

ସୁକର୍ମ କରିଲେ ଜୀବନ ମଧ୍ୟରେ 

          ହଟିଯିବ ଯେ ଅପକର୍ମ "

ଅଳସୁଆ ଦୁଃଖ ପାଇବ ଜୀବନେ 

          ଏକଥା ସତ୍ୟ ଯେ ପ୍ରମାଣ, 

ଅଳସ ପଣକୁ ତ୍ୟାଗିବ ଜୀବନୁ 

           ସୁକର୍ମ କରୁଥିବ ପୁଣ "

ବିଧାତାର ଵିଧି ବଡ଼ ଯେ ବିଚିତ୍ର 

          ମନ୍ୟୁଷ ହାତେ କିଛି ନାହିଁ, 

ସନ୍ତାନ ପାଇଁ କି ଯେତେ ଚେଷ୍ଟା କଲେ 

          ଭାଗ୍ୟ ରେଖାରେ ଯଦି ନାହିଁ "

ମଣିଷ ଜୀବନ ସରସ ସୁନ୍ଦର 

         ଗଢି ତୋଳିବାର ନାହିଁ, 

ସମାଜେ କହିବ କୋମଳ ବଚନ 

         ପ୍ରୀତ ହେବେ ଯେ ରଘୁସାଇଁ "

ଆଦର୍ଶ ଜୀବନ ଚଳିବା ପାଇଁକି 

         କରୁଥିବ ସଦା ଯେ ଚେଷ୍ଟା, 

ନହେଲେ ଜୀବନ ସାର୍ଥକ ହେବନି 

         ସଦା କରୁଥିବ ପ୍ରଚେଷ୍ଟା "

ଉପରୋକ୍ତ ନୀତି ନିୟମ ମାନିଲେ 

          ଜୀବନରେ ଶାନ୍ତି ପାଇବ, 

ନହେଲେ ଜୀବନେ କଷ୍ଟ ଯେ ପାଇବ 

         ନିଜକୁ ନିଜେ ବୁଝେଇବ "

ଶାସ୍ତ୍ରର ବାଣୀକୁ ମାନିଣ ଚଳିବ 

        ହୃଦୟ ମଧ୍ୟେ ଭକ୍ତି କରି, 

ନିଶ୍ଚୟ ଶାନ୍ତିରେ ରହିବ ଜଗତେ 

       ମନରୁ କେବେ ନ ପାଶୋରି "