ଜଗନ୍ନାଥଙ୍କ ଦର୍ଶନ(କାଳିଆ)

ମନ କାହିଁ ଆଜି ଅମାନିଆ ହୁଏ

ଦେଖିବାକୁ ତୋର ମୁଖ ରେ

    ମୋ ସୁନା ଧନ ।

ପ୍ରାଣ କାହିଁ ସତେ ଉଡ଼ିଯାଏ ମୋର

ପାଇବାକୁ ତୋ ସାନିଧ୍ୟ ରେ

    ରଙ୍କୁଣି ଧନ ।  

ଜୀବନ ମୋହର ଚାଲି ଯାଆନ୍ତା କି

ଯାଆନ୍ତି ସ୍ଵର୍ଗଦ୍ଵାର ରେ

   କଳା ସାଆନ୍ତ ।

ଦେହ ମୋର କ୍ଳାନ୍ତ ହୋଇ ଯାଆନ୍ତା କି

ଗଡ଼ନ୍ତି ତୋ ବଡ଼ ଦାଣ୍ଡରେ

  କଳା ଗୋବିନ୍ଦ ।

ତୃଷାରେ ଆତୁର ହୋଇ ଯାଆନ୍ତି କି

ପିଅନ୍ତି ଟଙ୍କ ତୋରାଣି ରେ

   ରଙ୍କ ରତନ ।

ଭୋକିଲା ପେଟକୁ ମିଳି ଯାଆନ୍ତା କି

ତୋ ଅବଢ଼ା ମହା ପ୍ରସାଦ ରେ

    ଚକା ନୟନ ।

ନିଦ ଆସି ଗଲେ ମିଳି ଯାଆନ୍ତା କି

ତୋ କୋଳ ସରଗ ସୁଖ ରେ

  ନନ୍ଦ ନନ୍ଦନ ।

ତେଣୁ କାଳିଆ ରେ ମନା କରିବୁନି

ଦେବାକୁ ତୋ ଦରଶନ ରେ

   ମୋ ଗଣ୍ଠି ଧନ ।