ଜଗା ପାଇଁ ପ୍ରୀତିପୁଷ୍ପ

ତୋଳି ଆଣିଛି ମୁଁ ଫୁଲ ଚାଙ୍ଗୁଡ଼ିଏ 

  ମିଶାଇ ପୀରତି ଫୁଲ

ଜଗା ପାଇଁ ନେବି ଗୁଣ୍ଡିଚା ମନ୍ଦିର

  ମନ ମୋର ଉତଫୁଲ ।

ସରଧାରେ ଗୁନ୍ଥି ହାରଟିଏ କରି

   ପ୍ରେମ ନୀର ଛିଞ୍ଚି ଦେବି

ସେନେହ ଡାଲାରେ ସଜାଇ ଫୁଲକୁ

   ପୁରସ୍ତମ ନେଇ ଯିବି ।

ଜନମବେଦୀରେ ବସିଅଛି ଜଗା

  ଚାଲିଅଛି ମହାରାସ

ମହାଲକ୍ଷ୍ମୀଙ୍କର କଟକଣା ନାହିଁ

  କାଳିଆ ମନ ହରଷ ।

ଆଡପ ମଣ୍ଡପେ ଆଳତୀ ଦେଖିବି

  ପିନ୍ଧାଇବି ଫୁଲମାଳ

ଲାଜରେ ଦେଖିବି କାଳିଆ ହସୁଛି

  ପୀରତିରେ ହୋଇ ଭୋଳ ।

ଫୁଲ ରସିଆ ସେ ରସିକ ନାଗର

   ଫୁଲରେ ସଜେଇ ହୁଏ

ଫୁଲରେ ଫୁଲରେ ସର୍ବାଙ୍ଗ ସଜେଇ

   ମନ୍ଦ ମନ୍ଦ ହସୁଥାଏ ।

ଚାହାଣୀ ସୁନ୍ଦର ହସ ତା ସୁନ୍ଦର

  ସୁନ୍ଦର ତାହାର ଠାଣି

ରୂପ ତା ସୁନ୍ଦର ରଙ୍ଗ ତା ମଧୁର

   ମନକୁ ନିଅଇ କିଣି ।

ସେ ମଧୁର ହସ କରିବ ବେହୋସ

   ଭୁଲିଯିବି ଥଳକୂଳ 

ଡର ଲାଗେ ମୋତେ ଜଗା ପୀରତିରେ

   ହୋଇ ଯିବି ପାଗଳ ।

ଆଖିରେ ନାଚୁଛି ମନରେ ବସିଛି

  ଅହରହ ଛବି ଦିଶେ

ଭୁଲି ପାରୁନାହିଁ ସେ ରୂପ ମାଧୁରୀ

   ସବୁଠି ତୁଳସୀ ବାସେ ।

ମନ ମୁଁ ଦେଇଛି ହୃଦୟ ଦେଇଛି

    ଜଗା ମୋର ପ୍ରାଣଧନ

ପ୍ରୀତି ଫୁଲ ହାର ଉପହାର ଦେଇ

    ତୋଷି ନେବି ଜଗା ମନ ।