Library
Profile
ଇଚ୍ଛାମୟ ତୁମେ ବୈକୁଣ୍ଠ ବିହାରୀ
ଇଚ୍ଛାମୟ ତୁମେ ବୈକୁଣ୍ଠ ବିହାରୀ
ଇଚ୍ଛାମୟ ତୁମେ ବୈକୁଣ୍ଠ ବିହାରୀ
ଶ୍ରୀକ୍ଷେତ୍ର ସୁନ୍ଦର ଶିରୀ ।
ମହୋଦଧି ତୀରେ ବଡ ଦେଉଳରେ
ବିତର କରୁଣା ବାରି ॥୧॥
ଇଚ୍ଛାରେ ତୁମର ସୃଜିଲ ସଂସାର
ତୁମେ ସିନା ଲୀଳାମୟ ।
ଷୋଳକଳା ଘେନି ରତ୍ନସିଂହାସନେ
ବିଜେ ତନୁ ଦାରବୀୟ ॥୨॥
କସ୍ତୁରୀ ଚନ୍ଦନ ହେଉଛ ଲେପନ
କରୁଣାନିଧାନ ହରି ।
ଭକତଙ୍କ ଡାକ ଶୁଣୁଛ ସଙ୍ଗତେ
ଭାଇ ଭଉଣୀଙ୍କୁ ଧରି ॥୩॥
କେତେ କେତେ ବେଶ ହୁଅ ପୀତବାସ
ପାଟ ପୀତାମ୍ବରୀ ପିନ୍ଧି ।
ତୁଳସୀ ମାଳିଆ ଦୟଣା ଚୂଳିଆ
ରଖ ଭକତଙ୍କୁ ବାନ୍ଧି ॥୪॥
ନିଜେ ବନ୍ଧା ହୁଅ ପାଟ ଦଉଡିରେ
ଅବିରତେ ଦୟା ବହି ।
ଭକତର ହୃଦ ଚନ୍ଦନ ବୋଲାଅ
ଭକ୍ତରଙ୍କା ଭାବଗ୍ରାହୀ ॥୫॥
ମର୍ତ୍ତ୍ୟର ବୈକୁଣ୍ଠ ଶ୍ରୀକ୍ଷେତ୍ରର ଶିରୀ
ତୁମେ ବୈକୁଣ୍ଠ ବିହାରୀ ।
ତୁମ ଦରଶନେ ତନୁ ମନ ମୋର
ପୁଲକିତ ହୁଏ ହରି ॥୬॥
ଦଶ ଚବିଶ ବତିଶ ଚଉଷଠି
ଅବତାର ହୁଅ ତୁମେ ।
ଦୁଷ୍କୃତ ନାଶନ ପତିତପାବନ
ବୋଲାଅ ମରତ ଧାମେ ॥୭॥
ତୁମେ ମାତା ପିତା ତୁମେ ବନ୍ଧୁ ସଖା
ତୁମେ ବିଦ୍ୟା ତୁମେ ଧନ ।
ତୁମେ ସର୍ବଦେବ ମୋର ଜଗନ୍ନାଥ
ତୁମେ ମୋର ପ୍ରାଣ ମନ ॥୮॥
ଭବସାଗରର ଦୁଃଖ ଦୂର କର
ଆହେ ବୈକୁଣ୍ଠ ବିହାରୀ ।
ତୁମ ନାମ ଜପି ତୁମ ରୂପ ଦେଖି
ଯାଏ ଏ ସଂସାରୁ ତରି ॥୯॥
