ହତ୍ୟା

ପଲ୍ଲୀ ଠାରୁ ଦିଲ୍ଲୀ ଯୋଉଠି ଦେଖିବ 

ସବୁଠି ରକତ ଛିଟା

ବଢ଼ି ବଢ଼ି ଚାଲେ ଅପରାଧୀ ସଂଖ୍ୟା

 ବଢ଼ି ଚାଲେ ନର ହତ୍ୟା ।

କାମ କ୍ରୋଧ ଲୋଭ ମଦ ଓ ମାତ୍ସର୍ଯ୍ୟ

 ଷଡ଼ରିପୁ ହଳାହଳ

ମଣିଷ ଭିତରେ କଲେଣି ରାଜୁତି

ସର୍ବେ ହୋଇ ଏକମେଳ ।

କାମନା ନିଆଁ ରେ କାମିନୀ କାଞ୍ଚନ

 ଜଳେ ତା ଜିଅନ୍ତା ଜୁଇ

ପ୍ରେମ ପ୍ରତାରଣା କରେ ବାଟବଣା

ହତ୍ୟା ବିଭୀଷିକା ପାଇଁ ।

କ୍ରୋଧେ ଜର୍ଜରିତ ହୋଇଲେ ମଣିଷ

ଭୁଲେ ହିତାହିତ ଜ୍ଞାନ

ଭୁଲେ ନିଜ ସତ୍ତା ବିବେକ ର ବାର୍ତ୍ତା

ଆତ୍ମୀୟ ସ୍ୱଜନ ଗୁଣ ।

ଅଣ୍ଟି ଛୁରୀ ପୁଣି ତଣ୍ଟି କାଟେ ଏଠି

ଲୋଭ ବଶବର୍ତ୍ତୀ ହୋଇ

ରକତ ର ମୂଲ ଭୂଲି ପିଏ ରକ୍ତ

 ହେଇ ଅବା ବାପ ଭାଇ ।

କ୍ଷମତା ର ମୋହ ଅନ୍ଧ କରେ ଏଠି

ରକ୍ଷକ ଭକ୍ଷକ ସାଜେ

ବାଡ ଖାଇଯାଏ ଫସଲ କୁ ଖୁଣ୍ଟି

 ଆଇନ୍ ବି ଆଖି ବୁଜେ ।

ରାଜ ରାସ୍ତା କଡେ ମଦ କାଉଣ୍ଟର

 ନେତାଏ ପାଇବେ ଅଂଶ

ସେଇ ନିଶାପାଣି ସାଜେ ହତ୍ୟାକାରୀ

 ବୁଡ଼ି ଯାଏ କେତେ ବଂଶ ।

ସୁଖ ସମ୍ବୋଗ କୁ ମନ ବଳେ ସିନା

ଅଣ୍ଟେ ନାହିଁ ଅରଜନ

ଛୁରୀ ଭୁଜାଲି ରେ ହତ୍ୟା କାରନାମା

ଲୁଟିବାକୁ ପରଧନ ।

ହାୟ ରେ ମଣିଷ ହେଲୁ ଅମଣିଷ

ତୁ କୁଆଡେ ଶ୍ରେଷ୍ଠ ଜୀବ

ନିଜ ପାଇଁ ନିଜେ ଗାତ ତୁ ଖୋଳୁଛୁ

 ଭୋଗିବାକୁ ପରାଭବ ।

ଆଇନ୍ କୁ ସିନା ମାରୁ ଆଖିଠାର 

 ଦେଖୁଛି ଉପର ବାଲା

କର୍ମ ଗୁଣି ଫଳ ଦେବ ସେ ନିଶ୍ଚୟ

 ଭାଗ୍ୟ ରେ ପକାଇ ତାଲା ।