ହେ ପୁସ୍ତକ
ହେ ପୁସ୍ତକ
ହେ ପୁସ୍ତକ ତୁମେ ଦେଶକାଳାତୀତ
ଜ୍ଞାନ ସାଗରର ପୋତ
ବେଦବର କର ଶ୍ରୁତି ଶାସ୍ତ୍ର ସାର
ମାପ ମହାକାଳ ସ୍ରୋତ |
ତୁମ ମହିମାକୁ ମହାସରସ୍ୱତୀ
ମହତି ବୀଣା ଝଙ୍କାରେ
ଶ୍ରୀକରେ ଧାରଣ ସହ ମୂଲ୍ୟାୟନ
କରୁଛନ୍ତି ସଦାକାଳେ |
ଅଗ୍ରପୂଜ୍ୟ ଗଣ ଈଶ ଗଜାନନ
ଲେଖନ ପୁସ୍ତକଧାରୀ
କବି ଶୁକ୍ରାଚାର୍ଯ୍ୟ ପୂଜ୍ୟ ଦୈତ୍ୟାଚାର୍ଯ୍ୟ
ସଦା ପୁସ୍ତକେ ଆଭାରି |
ଗୁରୁ ବୃହସ୍ପତି ଷଡ଼ ତତ୍ତ୍ୱଦର୍ଶୀ
ମହା ମହା ଋଷିଗଣ
ବ୍ୟାସ ଜଇମିନୀ କଣାଦ ବଶିଷ୍ଠ
ପାତଞ୍ଜଳି ଗଉତମ |
ଆଦିକବି ବାଲ- ମୀକ, କାଳିଦାସ
ମାଘ ଭାରବୀ ବିହ୍ଲଣ
ଶ୍ରୀହର୍ଷ ଭାରବୀ ଚରକ ଶ୍ରୁଶ୍ରୁତ
ଭରତ ନାଟ୍ୟ ରତନ |
ଚାଣକ୍ୟ ମିହିର ଆର୍ଯ୍ୟଭଟ୍ଟଆଦି
କଲେ ତୋତେ ବିରଚନ
ଅଷ୍ଟାଦଶ ବିଦ୍ୟା ଜ୍ଞାନ ବିଜ୍ଞାନରେ
ତୁହି ଯେ ଅସରା ଧନ |
ପୁରାଣରୁ ପର- ମାଣୁ ଯୁଗଯାଏ
ତୁମେ ଭରସାର ସ୍ଥଳ
ତୁମେ ହିଁ ଚନ୍ଦ୍ରାର୍କ ବିଦ୍ୟୁତ ପାବକ
ଜ୍ଞାନ ଆଲୋକ ବିତର |
ଧରମ ଦର୍ଶନ ନ୍ୟାୟ ବିଶ୍ଳେଷଣ
ସମାଜ ଵିଧି ବିଧାନ
ବିଭିନ୍ନ ଭାଷାରେ ସମଗ୍ର ବିଶ୍ୱରେ
ତୁମେ ସଦା ଅଗ୍ରମାନ୍ୟ |
ଶ୍ରୀମନ୍ଦିରେ ତୁମେ ମାଦଳା ପାଞ୍ଜିକୁ
ଭାଗବତ ଘରେ ପୋଥି
ଧର୍ମ ଗ୍ରନ୍ଥାଳୟେ ଅବା ନ୍ୟାୟାଳୟେ
ତୁମେ ସତ୍ୟ ରୂପୀ ସାକ୍ଷୀ |
ତୁମକୁ ଧାରଣ କରି ଏ ମଣିଷ
ଅସାଧ୍ୟ କରେ ସାଧନ
ତୁମେ ଜ୍ଞାନମୟ ତୁମେ ବ୍ରହ୍ମମୟ
ତୁମକୁ କୋଟି ନମନ |