ଗଣେଶାୟ ନମଃ

ବିଘ୍ନ ବିନାଶକ ପ୍ରଭୁ ବିନାୟକ

ତୁମକୁ କୋଟି ପ୍ରଣାମ

ଆଶୀର୍ବାଦ କର ନିର୍ବିଘ୍ନରେ ହେଉ

ସଂସାର ସକଳ କାମ ।

ବିବାହ ହେଉବା ବ୍ରତଘର ହେଉ

ଯଜ୍ଞ କର୍ମକାଣ୍ଡ ହେଉ

ସବୁ ଶୁଭ କାମେ ତୁମକୁ ସୁମରି

ଶୁଭକାର୍ଯ୍ୟ କରିଥାଉ ।

ଭାଦ୍ରବ ମାସରେ ଶୁକ୍ଳପକ୍ଷରେ ହିଁ

ଚତୁର୍ଥୀ ତିଥିରେ ପ୍ରଭୁ

ତୁମେ ପ୍ରତିବର୍ଷ ଆବିର୍ଭାବ ହୁଅ

ଦେଖାଦିଅ ଭକତଙ୍କୁ ।

ଏକ ହସ୍ତେ ଥାଏ ପ୍ରିୟ ଖସାଲଡ଼ୁ

ଅନ୍ୟ ହସ୍ତେ ପଦ୍ମ ପୁଷ୍ପ

ଅପର ଦୁଇରୁ ଏକେ ପାଶାଙ୍କୁଶ

ଆରରେ ଦିଅ ଆଶିଷ ।

ତୁମ କଲ୍ୟାଣରେ ବିଦ୍ୟା ବଢ଼ିଥାଏ

ବଢ଼େ ପୁଣି ଯଶ କୀର୍ତ୍ତି

ତୁମକୁ ପୂଜନ୍ତି ଭକ୍ତ ପ୍ରତି ସ୍ଥାନେ

ରଖି ପ୍ରଭୁ ତୁମ ମୂର୍ତ୍ତି ।

ଗଣେଶଙ୍କ ପୂଜା ପଡ଼ିଲେ ପିଲାଏ

ହୋଇଥା'ନ୍ତି ଭାରି ଖୁସି

ବିଦ୍ୟାଳୟ ହତା ଗୃହକୁ ସଜେଇ

ପୂଜିଥା'ନ୍ତି ମିଳିମିଶି ।

ଶିବ ପାର୍ବତୀଙ୍କ ମନ ମାଳିନ୍ୟରେ

ଦେବୀ ବିତାଡ଼ିତ ହେଲେ

ଶଙ୍କରଙ୍କ କୋପ ଶାନ୍ତ ପାଇଁ ତପ

ଗୁମ୍ଫାରେ ପାର୍ବତୀ କଲେ ।

ଉମା ଅଙ୍ଗରାଗ ମଳୁକରୁ ଜାତ

ଗଣେଶ ଜଗିଲେ ଦ୍ଵାର

ଗୁମ୍ଫା ଭିତରକୁ ଯିବାକୁ ଶିବଙ୍କୁ

ବାଧା ଦେଲେ ବାରମ୍ଵାର ।

କ୍ଷୀଣକୋପୀ ଶିବ ଯୁଦ୍ଧେ ଗଣେଶଙ୍କ

କରିଲେ ଶିର ଛେଦନ

ପରେ ନିଜ ପୁତ୍ର ଜାଣି ଜୀବ ଦେଲେ

ଲଗାଇ ଗଜ ଆନନ ।

ଲମ୍ବୋଦର ତଥା ଗଜାନନ ତୁମେ

ବକ୍ରତୁଣ୍ତ ପରା ପୁଣି

ବହୁ କଥା ଶୁଣ ସଂକ୍ଷିପ୍ତରେ କୁହ

ତେଣୁ ପ୍ରଭୁ ତୁମେ ଗୁଣୀ ।

ଗଣେଶ ପୂଜାରେ ଆସ୍ଥାନ ପାଖରେ

ଖାତା,ବହି ରଖିଥାଉ

ନୂଆ ଜାମା ପିନ୍ଧୁ ପୂଜା ଶେଷ ଯାଏଁ

ଉପବାସ ଆମେ ରହୁ ।

ମିଳିମିଶି ବସି ପ୍ରସାଦ ଖାଇବା

ଅମାପ ଆନନ୍ଦ ଦିଏ

ପିଆଜ,ରସୁଣ ପଡ଼େନି ଖାଦ୍ୟରେ

ସବୁଠି ଅରୁଆ ହୁଏ ।

ମଦପିଇ ଡିଜେ ବଜାଇ ଗଡ଼ିବା

ଛାଡ଼ ମନ୍ଦ ପରମ୍ପରା

ଗଣେଶ ପୂଜାକୁ ପାଳ ଭକତିରେ

କୋଣ ଅନୁକୋଣେ ପରା ।