Library
ଗଣେଶ ପୂଜନ
ଗଣେଶ ପୂଜନ
ବିଘ୍ନ ବିନାଶକ ପ୍ରଭୁ ଗଜାନନ
ବିଘ୍ନ ପ୍ରତି ମୁହୁର୍ତ୍ତରେ
ବିଘ୍ନ ନାଶ କର ଗଉରୀ ନନ୍ଦନ
ଶରଣ ତୋ ଚରଣରେ ।
ସର୍ବାଗ୍ରେ ପୂଜିତ ବୋଲି ଅଗ୍ରପୂଜ୍ୟ
ସିଦ୍ଧି ବୁଦ୍ଧି ଜ୍ଞାନଦାତା
ଜ୍ଞାନ ଚକ୍ଷୁ ବଳେ ଜଗତ ଜିତିଛ
କେନ୍ଦ୍ର କରି ପିତାମାତା ।
ଭାଦ୍ରବ ମାସର ଶୁକ୍ଳ ଚତୁର୍ଥୀରେ
ଗଣେଶ ଚତୁର୍ଥୀ ବିଧି
ଜ୍ଞାନୀ ଅବା ମୁର୍ଖ ସଭିଏଁ ପୁଜନ୍ତି
ସମସ୍ତେ ଚାହାଁନ୍ତି ବୁଦ୍ଧି ।
ପ୍ରତି ଶିକ୍ଷାନୁଷ୍ଠାନେ ପୂଜା ପାଳନ
ବିଦ୍ୟାର୍ଥୀଙ୍କ ମନେ ଭକ୍ତି
ବହୁ ଆଡ଼ମ୍ବରେ ପାଳନ ହେଉଛି
ତୁମେ ଅଗତିର ଗତି ।
ପୁର ପଲ୍ଲୀ ଆଉ ସହର ବଜାର
ସବୁଠି ଖୁସି ଲହର
ଅନ୍ୟ ଦେବତାଙ୍କ ଜନମ ତିଥିରେ
ହୁଏ ନାହିଁ ଏ ସମ୍ଭାର ।
ଯୁବ ଗୋଷ୍ଠୀଙ୍କ ପ୍ରିୟ ପୂଜା ଉତ୍ସବ
ପୂଜା ମଣ୍ଡପ କମ୍ପୁଛି
ମଣ୍ଡପ ଆଗରେ ବି ମନୋରଞ୍ଜନ
ଗୀତ ନାଚ ହେଉଅଛି ।
ରଙ୍ଗ ଓ ବେରଙ୍ଗ ତୋରଣ ସହିତ
ଉନ୍ମାଦନାର ସଙ୍ଗୀତ
ଭକ୍ତି ଥାଉ ଅବା ନ ଥାଉ ମନରେ
ହେଉ ଅଛି ନାଚ ଗୀତ ।
ପ୍ରତି ବର୍ଷ ଏହି ଭାଦ୍ରବ ମାସରେ
ଗଣେଶ ପୂଜା ଉତ୍ସବ
ସାଂସ୍କୃତିକ କାର୍ଯ୍ୟକ୍ରମ ଆୟୋଜନ
ଖୁସି ଆନନ୍ଦର ପର୍ବ ।
ଜ୍ଞାନ ପ୍ରାପ୍ତି ପାଇଁ ପୂଜା ଆରାଧନା
ନାମକୁ ମାତ୍ର ରହିଛି
ଗଣେଷଙ୍କ ପୂଜା ପାଳନ ଆଳରେ
ଅରାଜକତା ଚାଲିଛି ।
ଚାନ୍ଦା ଭେଦା ପାଇଁ ବିଶୃଙ୍ଖଳା ସୃଷ୍ଟି
ବାଦ ବିବାଦର ତାତି
ବିଘ୍ନ ନାଶକ ପୂଜା ନାମରେ ହିଁ
ବିଘ୍ନ ହେଉଛି ଉତ୍ପତ୍ତି ।
ପୂଜା ସରିଗଲେ ଭସାଣି ହେଉଛି
ସବୁଠୁ ବଡ ସମ୍ଭାର
ନଦୀ ପୋଖରୀ ଓ ସମୁଦ୍ର ଗର୍ଭରେ
ବିସର୍ଜନ ପଟୁଆର ।
ପରିବେଶ ଏବେ ହେଉଛି ଦୂଷିତ
ପୁଣି ମୂର୍ତ୍ତି ବିସର୍ଜନ
ଭକ୍ତି ଭାବ ଥିଲେ ପ୍ରଥମେ ଶୁଣିବେ
ପ୍ରଭୁଙ୍କର ବଡ କାନ ।
ଭାଇଚାରା ପର୍ବ ଗଣେଶ ପୂଜାରେ
ସବୁଠୁ ବଡ ଆଶ୍ଚର୍ଯ୍ୟ
ଜାତି ଧର୍ମ ଭେଦ ଭାବ ଭୁଲି ଯାଇ
ଗଣେଷଙ୍କ ପୂଜା କାର୍ଯ୍ୟ ।
ପାପାଙ୍କୁଶ ତୁମ ପାଖରେ ରହିଛି
ପାପ କରୁଅଛ ନାଶ
ପାପର ଭାର ରେ ବୁଡ଼ିଛି ସମାଜ
କଳୁଷ କୁ କର ନାଶ ।
ଧନ୍ୟ ପ୍ରଭୁ ତୁମେ ହିଁ ଗଣ ନାୟକ
କୃପା ଦୃଷ୍ଟି ରହି ଥାଉ
ମନ୍ଦ ଚିନ୍ତା ଧାରା କୁସ୍ଚିତ ଭାବନା
ଅଙ୍କୁଶ ରେ ନାଶ ହେଉ ।
ସଦବୁଦ୍ଧି ଦିଅ ସବୁରି ମନରେ
ଏହି ଅଳି ଶ୍ରୀଚରଣେ
ହର୍ଷ ଉଲ୍ଲାସରେ ଗଣେଶ ପୂଜନ
ମନେ ହେଉ ପ୍ରତି କ୍ଷଣେ ।
