ଗୋଧୂଳୀର ସ୍ୱପ୍ନ

ମୃଦୁ ସମୀରଣେ     ଗୋଧୂଳୀ ପଢୁଛି

      ଚୋରା ବସନ୍ତର ଚିଠି,

ମଉନ ହିଆରେ    ଚୋରା ପୀରତିରେ

      ସାଜିଛି ଫଲଗୁ ଷଠି ।

ସାତ ରଂଗେ ଭିଜି     ଓଢଣା ବରଜି

      ବସିଛି ଗୋଧୂଳୀ ଲଗ୍ନା,

ଜମୁନା ଘାଟର      ଅଳସୀ ରାଧିକା

     କାହ୍ନୁ ପ୍ରେମରେ ନିମଗ୍ନା ।

ଦିଗବଳୟ କୋଳେ  ସିନ୍ଦୁର ଟୋପାରେ

     ନବ ବଧୂ ରୂପ ଧରି,

ରକ୍ତିମ ପାଟରେ     ଭକ୍ତି ଓଢଣୀରେ

     ବାଢିଅଛି ଅର୍ଘ୍ୟ ଥାଳି ।

ପଶୁ ପକ୍ଷୀ ଜୀବେ    ଦେଇଣ ବିଦାୟ

     ସନ୍ଧ୍ୟାରାଣୀ ଉପଗତେ,

ମାନସ ମନ୍ଥନେ     ବାରୁଣୀ ଗଗନେ

     ଉପେକ୍ଷିତ ଅବିରତେ ।

ପ୍ରୀତି ରଂଗ ବୋଳି     ପଡଇ ଝାଉଁଳି

      ସପନକୁ କରି ସାର,

ଗୋଠଫେରା ଟାପୁ    ଆତସବାଜିରେ

      ଫେରିଯାଏ ବାପଘର ।

ନୀଡଫେରା ପକ୍ଷୀ   ଗାଇ ପ୍ରେମ ଚୋଖି

      କରିଥ‍ାନ୍ତି ବନ୍ଦାପନା,

ଶିଆଳ ତୂରୀରେ      ଲୁଚିଯାଏ ଦୂରେ

     ସନ୍ଧ୍ୟାକୁ କରି ବନ୍ଦନା ।