ସଂଘର୍ଷର ରକ୍ତତୀର୍ଥ

ଶୋଷଣ ହୋଲିରେ    ମାନବ ଭିଜଇ

       ଦଦରା ନାବରେ ବସି,

ମଗର ଶାଙ୍କୁଚ      ସାଜିଣ ପିଶାଚ

       ଜଗିଛନ୍ତି ଦିବାନିଶି ॥

ଅର୍ଥ ମେରୁଦଣ୍ତ     ଭଙ୍ଗା ଦଧି ଭାଣ୍ତ

      ବିବେକ ଖାଉଛି ଚାଟି,

ଭଦ୍ର ମୁଖା ତଳେ    ସ୍ୱାର୍ଥ ଦୀପ ଜଳେ

      ସାନ୍ତ୍ୱନାକୁ ଦେଇ ଭେଟି ॥

କପଟ ପଶାରେ     ମାପ ତଉଲରେ

      ହୁଏ ଖାଲି କିଣାବିକା,

ଶାଗୁଣା ମୁହଁର     ଶାକାହାରୀ ସ୍ୱର

      ଉଡେ ବିଜୟ ପତାକା ॥

ମଦ ମାଂସ ନାରୀ    ଆଭିଜାତ୍ୟ ଶିରୀ

      କଂସାରୀ ଘରର ପାରା,

ଘର ଅଛି ଚାଳ      ଗଲାଣି ବଉଳ

     ସଭ୍ୟତା ସଫା ସୁତୁରା ॥

ଚକ୍ରବ୍ୟୁହ ଜୁଇ     ରକ୍ତ ମାଂସ ଖାଇ

     ପଲଙ୍କେ ମାରଇ ହାଇ,

ସାଧୁବାଣୀ କହି     ବିଭବ ଚୋରାଇ

     କାନ୍ଦୁ ଆମେ କଇଁକଇଁ ॥

ନିର୍ଲଜ ମୁହଁରେ     ଗାଉ ଆଖଡାରେ

     ସାଜି ଖଳ ବିଭୀଷଣ,

ବ୍ୟାସ ସରୋବରେ   ଲୁଚି ନିର୍ଭୟରେ

    ହେଉ କଳି ଦୁଃର୍ଯ୍ୟୋଧନ ॥

ଅଙ୍କ ଦ୍ରବ୍ୟେ ପ୍ରୀତି    ଦେଖି ନିତି ନିତି

     ମୋହ ମାୟା ଶିକୁଳିରେ,

କଚ୍ଛପ ସାଜିଛୁ      ବାଲି ଗରଡାରେ

     ଆଭିଜାତ୍ୟ ବନ୍ଧନରେ ॥

ନିଆଁଖୁଣ୍ଟା ଦେଇ     ନରମାଂସ ଖାଇ

      ଶ୍ୱାନ ସାଜିଛୁ ଜଗତେ,

କାଳ ବନ୍ଧନରେ    ମୋହ ଜଉଘରେ

      ସପନ ଦେଖୁ ମରତେ ॥