ଏକ ନୂତନ ଦିଗନ୍ତର ଅନ୍ୱେଷଣରେ

ଏକ ନୂତନ ଦିଗନ୍ତର ଅନ୍ୱେଷଣରେ

ସନ୍ଦେହୀ ମନ ଅସରନ୍ତି ପ୍ରଶ୍ନବାଚୀରେ

ବଢିଚାଲିଛି ସମୟର ଅନ୍ତରାଳରେ

ପର ଏବଂ ଆତ୍ମୀୟତାର ଅନୁସନ୍ଧାନରେ ।

ଭୁଲ୍ ଠିକ୍ ଆଉ ପାପ ପୁଣ୍ୟର ଦ୍ୱନ୍ଦରେ

ହଜାଇଛି ମଣିଷତ୍ୱ ଅଜ୍ଞାନତାର ସ୍ପର୍ଶରେ

ମୋହଗ୍ରସ୍ତ ପଥିକ ମାୟାର ବନ୍ଧନରେ

ଅଗ୍ରସର ନୂତନ ଆଲୋକର ଅପେକ୍ଷାରେ ।

ମନ ଅସୁମାରୀ ପ୍ରଶ୍ନର ଅକ୍ତିଆରରେ

ଖୋଜେ ନିଜ ଠିକଣା ଘନ ଅନ୍ଧକାରରେ

ପଡି ଜନ୍ମ ମୃତ୍ୟୁର ଅହରହ ଚକ୍ରରେ 

କରେ ମୁକ୍ତିଲାଭ ଆଶା ବିଭୁ ଚରଣରେ ।

କେତେ ଯେ ଯୁଗ ଅପେକ୍ଷାର ଅନ୍ତ ପରେ

ଦୂର ଦିଗନ୍ତର ଶେଷେ ନିସ୍ତବ୍ଧ ପ୍ରହରରେ

ଆତ୍ମା ସହ ପରମାତ୍ମାଙ୍କ ମିଳନ ଲକ୍ଷ୍ୟରେ 

ମାଟିର ପିଣ୍ଡୁଳାଟି ଲୀନ ହେବ ଅନଳରେ ।

ଏକ ନୂତନ ଦିଗନ୍ତର ଅନ୍ୱେଷଣରେ

ଆଜୀବନ ପ୍ରତି କର୍ମମୟ ପରିସ୍ଥିତିରେ

ଗୁହାରୀ କରଇ ପ୍ରଭୁ ତୁମ ପାଦପଦ୍ମରେ

ଜପି ତବନାମ ମିଶୁ ଶରୀର ପଞ୍ଚତତ୍ତ୍ଵରେ ।