ଏଇ ମୋ ଦେଶ ଭାରତ

ଏଇ ମୋ ଦେଶ ଭାରତ,

ଜଗତ ଭିତରେ ଅଟଇ ଶ୍ରେଷ୍ଠ

ଏଇ ମୋ ଦେଶ ଭାରତ ।

ରତ୍ନାକର ଯା'ର ପୟର ଧୋଉଛି

ହିମାଦ୍ରି ତା' ଶିରେ କିରୀଟ ସାଜେ

ଅମ୍ଳାନ ପାଟ ଯେ ପିନ୍ଧାଏ ଅଟବୀ

ବିନ୍ଧ୍ୟ ଗିରି କଟୀ ମେଖଳା ସାଜେ ।

ତିନିପାର୍ଶ୍ୱେ ବେଢ଼ି ରହିଛି ବାରିଧି

କେତେ ନଦନଦୀ ଅଙ୍ଗ ରେ ରାଜେ

ଗଙ୍ଗା ବ୍ରହ୍ମପୁତ୍ର ଗୋଦାବରୀ ଆଦି

ଅଙ୍ଗ ଅଳଙ୍କାର ପ୍ରାୟେକ ବିଜେ ।

ଏଇ ମୋ ଦେଶ ଭାରତ

ବୀର ପ୍ରସବିନୀ ଅମୃତମୟୀ ସେ

ତା' ନାମ ରେ ସତେ ସୁଧା କି ଝରେ

କେତେ ଯେ ମହାତ୍ମା ବୀରଶୂର ନର

ଜନମିଲେ ଆସି ତାହାରି କୋଳେ ।

କେତେ ଯେ ବିଦୁଷୀ ସତୀସ୍ୱାଧୀ ନାରୀ

ଜନମି ତା' ଅଙ୍କ କଲେ ଉନ୍ନତ

କେଉଁ ପୁଣ୍ୟ ବଳେ ଜନ୍ମିଲି ତା' କୋଳେ

ତନୁ ପ୍ରାଣ ମୋର ହେଲା କୃତାର୍ଥ ।

ଏଇ ମୋ ଦେଶ ଭାରତ

କରେ ମୁଁ ଶପଥ କରିବିନି ବ୍ୟର୍ଥ

ଭାରତ ମାତା ର ଯଶ ଗୌରବ

ମାତୃଭୂମି ଟେକ ତାହାର ମହତ

ରଖିବି କରି ମୁଁ ମୋ ପ୍ରାଣପାତ ।

ଏଇ ମୋ ଦେଶ ଭାରତ,

ଜଗତ ଭିତରେ ଅଟଇ ଶ୍ରେଷ୍ଠ

ଏଇ ମୋ ଦେଶ ଭାରତ