ହୃଦୟର ଉପହାର

ଦିନ ପରେ ଦିନ ମାସ ଋତୁ ଯାଇ

ବରଷ ବି ଗଲା ବିତି

ତୋ ପ୍ରେମ ନିର୍ଝରଣୀ ଝରେ ଅବିରତ

ଉଣା ହୋଇନି ତୋ ପ୍ରୀତି ।

ସମ୍ପର୍କ ସାଗରେ ଜୁଆର ଆସିଛି

କେବେ ପୁଣି ଥିଲା ଭଟ୍ଟା

କେବେ ଆସିଥିଲା ରଙ୍ଗୋଲି ଫଗୁଣ

ସ୍ମୃତି ତାର ଭାରି ମିଠା ।

ମୃଦୁ ମଳୟ ର ପିରତି ଛୁଆଁରେ

ଚାଲିଛୁ ଧରି ମୋ ହାତ

ଆସିଥିଲା ଯେବେ ଝାଞ୍ଜି ବଇଶାଖ

ତୁ ସାଜିଛୁ ମୋର ଛାତ ।

ତୋ ମିଠା ଆକଟ ମାନ ଅଭିମାନ

ମିଛ ଆଡରୁଷା ପ୍ରେମ

କେବେ ତୁ ଶ୍ରାବଣୀ ପ୍ରୀତିର ଫାଲଗୁନୀ

କିଣି ନେଉ ମୋର ମନ ।

ହସ ଲୁହ ଭରା ଦୁନିଆ ଆମର

ନ ଲାଗୁ ନଜର କା'ର

ଏହିପରି ଥାଉ ମାଆ ଙ୍କ କରୁଣା

ଆଉ ନାହିଁ କିଛି ପାଇବାର ।

ମାଗିନାହୁଁ କେବେ ଉପହାର ମୋତେ

କିଛି ଦେଇନାହିଁ ବୋଲି 

ଏ ହୃଦୟକୁ ମୋର ଏ ଶୁଭଦିନରେ

ଉପହାର ତୋତେ ଦେଲି ।