ଏ କାଳର ସକାଳ

ପୂର୍ବାଶାରେ ଦିଶେ ଉଦିତ ସୂର୍ଯ୍ଯର ଉତ୍ତରଣ 

ସଞ୍ଚରିଯାଏ ନୂତନ ସକାଳର ସମ୍ଭାଷଣ । 

ତାଜା ଖବରରେ ସାଜେ ପୁଣି କେତେ ବିସ୍ଫୋରଣ 

ଭାଗବତର ସଂଭ୍ରମ ଅପଭ୍ରଂଶ ସଂସ୍କରଣ। 

ଆବର୍ତ୍ତନ ର ଗତାନୁଗତିକ ପୁନରାବୃତ୍ତି

ଜୀବନ ଜିଜୀବିଷାର ପୁଣି ବିକଳ ଆବୃତ୍ତି। 

ନୀତି ଅନୀତିରୁ ଉର୍ଦ୍ଧ୍ବରେ ସ୍ବାର୍ଥାନ୍ଧ ରାଜନୀତି

ଆବେଗହୀନ ଦୌଡରେ କି ବସ୍ତୁବାଦୀ ପ୍ରଗତି ! 

 ଧୂମିଳ ଚେତନା ଦିଗବଳୟେ ଭ୍ରମିତ ସ୍ବପ୍ନ

ଈର୍ଷା ପ୍ରତିହିଂସାରେ ବିତେ ନିତ୍ୟ ଆୟୁଷ ଲଗ୍ନ। 

ପ୍ରାପ୍ତି ପରିତୃପ୍ତିର ଉଚ୍ଚାଟ ଆକାଂକ୍ଷାରେ ମଗ୍ନ

ବିବର୍ତ୍ତନ ଛନ୍ଦେ, ମାନବୀୟ ପ୍ରଗତି କି ଭଗ୍ନ ! 

 ତମସାଚ୍ଛନ୍ନ ରଜନୀ ଏବେ ସତଧା ବିଦିଘ୍ନ! 

ଏ କାଳର ସକାଳରେ ଭବ୍ୟ ବିଜୟ ଆଚ୍ଛନ୍ନ।