Library
Profile
ଦଶମହାବିଦ୍ୟା
ଦଶମହାବିଦ୍ୟା
ସତୀ ଅଗ୍ନିଝାସ ଶଙ୍କର ବିରସ
ଶରୀର ଯେ ଖଣ୍ଡ ଖଣ୍ଡ
ବିଭିନ୍ନ ସ୍ଥାନରେ ପଡ଼ି ସତୀ ଅଙ୍ଗ
ହୋଇଗଲା ଶକ୍ତି ପୀଠ ।
ପାର୍ବତୀ ରୂପରେ ପୁନଃ ଆବିର୍ଭାବ
ଦଶଟି ସ୍ୱରୂପେ ଗଢ଼ା
ଦଶଦିଗେ ରହି ଦଶ ମହାବିଦ୍ୟା
ଶିକ୍ଷା ଦେଲେ ମା ଅନୁଢ଼ା ।
ବିଭିନ୍ନ ରୂପରେ ବିଭିନ୍ନ ବାରତା
ଦେଇ ଥାନ୍ତି ମାତା ପୁଣି
ମହାକାଳୀ ପରା କର୍ମ ରୂପ ତାଙ୍କ
ସଂହାର ବିଦ୍ୟା ରହଣି ।
ଏହି ବିଦ୍ୟା ଦିଏ ମୁକତି ର ଶିକ୍ଷା
ଲୋଭ ମୋହରୁ ବିରତ
ଜୀବନେ ଏ କରିଲେ ଆୟତ
ମିଳିଯାଏ ମୁକ୍ତି ପଥ ।
ତାରା ଦଶରୂପା ମଧ୍ୟେ ଅନ୍ୟତମା
ତାରଣ ବିଦ୍ୟା ଅଟଇ
ସହଯୋଗୀ ପତ୍ନୀ ତତ୍ତ୍ଵ ର ଆଧାର
ଦୁଃଖ କଷ୍ଟ ତାରି ଥାଇ ।.
ଷୋଡ଼ଶୀ ଶକ୍ତି ର ଚେତନ ରୂପରେ
ତ୍ରିପୁରା ସୁନ୍ଦରୀ ଜାତ
ଉନ୍ମୋଚ଼ନ ବିଦ୍ୟା ଅଟଇ ଶକ୍ତିର
ଚେତନା ବୃଦ୍ଧିର ମିତ ।
ଭବନେଶ୍ୱରୀ ଯେ ପ୍ରେମ ତତ୍ତ୍ଵେ ଭରା
ଶକ୍ତିଙ୍କ ମୋହିନୀ ରୂପ
ମନ ନିୟନ୍ତ୍ରଣ ମୋହିନୀ ବିଦ୍ୟା ଯେ
ଆତ୍ମ ସାକ୍ଷାତର ଭୂପ |
ଛିନ୍ନମସ୍ତା ପୁଣି ବିଛିନ୍ନ ରୂପିଣୀ
ସଂସ୍କାର ବିଦ୍ୟା ରେ
ଭରା
ଅହଂ କୁ ଛେଦନ ବନ୍ଧୁ ତତ୍ତ୍ଵେ ପୂର୍ଣ୍ଣ
ବରଷେ ଶାନ୍ତି ର ଧାରା ।
ଧୂମାବତୀ ପରା ଜ୍ଞାନରସ୍ୱରୂପ
ଧୂମ ଅଟଇ ତା ତତ୍ତ୍ଵ
ମୋକ୍ଷ ବିଦ୍ୟା ବୋଲି ବିଦିତ ଧରାରେ
ମୋକ୍ଷ ପ୍ରଦାନେ ଗୁରୁତ୍ୱ ।
ବଗଳା ଅଟନ୍ତି ମୌନ ରୂପେ ସ୍ଥିତ
ଉପଦେଷ୍ଟା ତତ୍ତ୍ଵ କୁହେ
ନିରବେ ରହି ଯେ ସମ୍ମୋହନ ବିଦ୍ୟା ସହଜେ ଶିଖାଇ ଦିଏ |
ମାତଙ୍ଗୀ ଅଟନ୍ତି ସମୟରୂପିଣୀ
ସମର୍ପଣ ତତ୍ତ୍ଵେ ଭରା
ଉର୍ଦ୍ଧ୍ଵକୁ ଯିବାର ରାସ୍ତା ବତାଏ ସେ
ଉତ୍ତରଣ ବିଦ୍ୟା ପରା |
ସୌନ୍ଦର୍ଯ୍ୟ ରପିଣୀ କମଳା ଶକ୍ତି ଯେ
ସମ୍ପଦ ତତ୍ତ୍ଵ ବୁଝାଏ
ନିରବିଛିନ୍ନତା ବିଦ୍ୟାର ଭାବକୁ
ତନ୍ତ୍ର ରୂପରେ ବୁଝାଏ ।
ଦଶମହାବିଦ୍ୟା ଅମୂଲ୍ୟ ସାଧନା
ନୀତିଗତ ସୂତ୍ରେ ବନ୍ଧା
ନୀତଗତ ଭାବେ ପାଳନ କରିଲେ
କଷ୍ଟୁ ମୁକ୍ତି ମିଳେ ସଦା ।
ଆଶ୍ୱିନ ମାସର ସୁନୀଳ ଆକାଶ
ସୁନିର୍ମଳ ଏଇ ଧରା
ଶକ୍ତି ଆରାଧନା ପୁଣ୍ୟ ମାସେ ହୁଏ
ଶକ୍ତି ପୀଠ ହରା ଭରା ।
ଜୀବନ ଆଧାର ଶକ୍ତିର ସଂଚ଼ାର
ଦଶ ମହାବିଦ୍ୟା କଥା
ଜୀବନ ବାର୍ତ୍ତାକୁ ଆହରଣ କରି
ହୋଇବା ଜଗତ ଜିତା ।
