ଦିଅ ନାଶି ମୋର ଅହଂ

 

ଅଜବ ଆତଙ୍କେ ମୁହିଁ ବିଚଳିତ ନାଶ ମୋର ଅହଙ୍କାର,

ତୁମେ ମହାପ୍ରଭୁ ଗରବ ଗଞ୍ଜନ ନାଶ ଅହଂ ଚକ୍ରଧର ।

ଆତ୍ମା କବଳିତ ସଂସାର ଜାଲରେ ଶିକାରୀ ମୋର ଶରୀର,

ବଳିଷ୍ଠ ବାହୁରେ କେତେ ହତ୍ୟା କରି ପାଳୁଛି ମୁହିଁ ଉଦର ।

ମୋହ ମାୟା ମୋତେ କରିଛି ବିବଶ ଜଳଯାତ୍ରୀ ସଂସାରର

ରଖ ବାହୁ ତଳେ ଆହେ ମହାବାହୁ ପ୍ରାର୍ଥନା କର ସ୍ୱୀକାର ।

ତୁମରି  ପରଶେ  ଲଭିଛି  ସର୍ବଶ୍ରେଷ୍ଠ ପୁନର୍ଜନ୍ମ ପ୍ରସ୍ତର,

ଦିଅ ଦିବ୍ୟଦୃଷ୍ଟି ମୁଁ ନୁହଁ ସଞ୍ଜୟ ବିଦୂର କି ଯୁଧିଷ୍ଠିର ।

ପୁନର୍ବାର ଲୋଡ଼ା ସେ ମହାଭାରତ ନୀରବ ଯୁଦ୍ଧ ସମର,

ସଂଶୟ ଜାଲରେ ବୀର ପାଣ୍ଡୁ-ପୁତ୍ର ସାଜ ପୁଣି ସହୋଦର ।

ରହିଛି ଓଳିଏ ଭାରତ  ସମର  ଦିଅ  ଆତ୍ମଜ୍ଞାନ ଗୀର

ରକ୍ତନଦୀ  ନୁହଁ  ନିର୍ମଳ  ହୃଦୟ  ବିପ୍ଳବର  ସୂତ୍ରଧାର ।

ସବୁରି ମୂଳରେ ମୋର ଅହଙ୍କାର ଉଭା ପ୍ରତୀତ ପ୍ରାଚୀର,

ଆହେ ଆତ୍ମଜ୍ଞାନୀ ହୁଅ ହେ ସାରଥୀ ମୋର ହୃଦୟ ରଥର ।