ସାହସ: ଏକ ଗଜଲ

ଆଉ ଥରେ ଭେଟିବାକୁ ଜୁଟୁନି ସାହସ

ପୁଣି ଥରେ ଫୁଟିବାକୁ ଜୁଟୁନି ସାହସ ।

ଲୁଟିବା ଓ ଲୁଟେଇବା ଖୁଉବ୍ ଅନ୍ତର

ଆଉ ଥରେ ଲୁଟିବାକୁ ଜୁଟୁନି ସାହସ ।

ଯେବେଠାରୁ ମୁହିଁ ଲେଖିଦେଲି ଚୁକ୍ତିନାମା

ହାତ ଲେଖା କାଟିବାକୁ ଜୁଟୁନି ସାହସ।

ଦେଖି ମୁହଁ ଫଣଫଣ ଆଉ ସେ ମେଘର

ଆକାଶରେ ଘୋଟିବାକୁ ଜୁଟୁନି ସାହସ ।

ଭାଙ୍ଗିଗଲା ଟାଣପଣ ଦେଖି ସେ ଅନ୍ଧାର

ତା' ଦୁଆରୁ ହଟିବାକୁ ଜୁଟୁନି ସାହସ।

ଯେବେଠୁଁ ଶିଖିଛି ହାତ ପତେଇବା କଳା

ଆଉ କେବେ ଖଟିବାକୁ ଜୁଟୁନି ସାହସ ।

ଜାଣି ଥା' ମୁନ୍ନା ତା' କଥା ତୀକ୍ଷ୍ଣ ଖଡ୍ଗ ଧାର

ଆଉ ଥରେ କଟିବାକୁ ଜୁଟୁନି ସାହସ ।