ଚଉପଦୀ - ଦୂତୀ କହିବୁ ଗୋ
ଚଉପଦୀ - ଦୂତୀ କହିବୁ ଗୋ
କବି - ଉପେନ୍ଦ୍ର ଭଞ୍ଜ
ରାଗ - ପରଳ ତାଳ - ଏକତାଳି
ଦୂତୀ କହିବୁ ଗୋ
ଚିତ୍ତଚୋରାଙ୍କୁ ଏତେକ ।
ଗତ ସ୍ନେହ ହରି ଗଲେ ଦୂର କରି
ଚିତ୍ତ ହୁଏ ଦକଦକ । ପଦ ।
ମନ୍ଦର ବେନି ମୋ ଉରରେ ଥିବାରୁ
ପନ୍ଦର ପଡ଼ିଲା ଶିରେ ।
ମଗା ପ୍ରୀତି ଦଗା ଜାଣି ମୁଁ ନଥିଲି
ଏହା ଥିଲା ମୋ କର୍ମରେ । ୧ ।
ଚବିଶ ପଦରେ କେଉଁ କାର୍ଯ୍ୟ ଅବା
ଦୁଇ ଯେବେ ହେଲା ଦୂର ।
ଅନ୍ତର ଆଠ ପରାୟେ ଏଣିକି ମୁଁ
ତିନି ଲଗାଅ ସତ୍ୱର । ୨ ।
ଧନ ସେବା ଦିନୁ ନବଯୌବନକୁ
ତାଙ୍କୁ ଭୋଗ କରାଇଲି ।
ଦୁଇପତି ଅରି ଆୟତ୍ତରେ ମୁଁ ଯେ
କେଡ଼େ ଦଶାକୁ ଲଭିଲି । ୩ ।
ପଚାରିବୁ ଦୂତୀ ମୁଁ ତାଙ୍କର ପରା
ଏବେ କାହାର ହୋଇବି ।
ରସିକ ହୋଇଲେ ଏ ଭାବ ଜାଣିବେ
ଉପଇନ୍ଦ୍ର ଭଞ୍ଜ ଭାବି । ୪ ।