ପୂର୍ଣ୍ଣବ୍ରହ୍ମ ଏକା ସତ

ଦର ଗଢା ଦିଅଁ ଦାରୁର ଦେବତା

    ଦାରୁବ୍ରହ୍ମ ଜଗନ୍ନାଥ 

ଅଗତିର ଗତି  ଜଗତର ପତି

   ପୂର୍ଣ୍ଣବ୍ରହ୍ମ ଏକା ସତ॥୦॥

ଚଉଦ ବ୍ରହ୍ମାଣ୍ତେ ଭକତର ପିଣ୍ତେ

    ଭକତିରେ ପ୍ରକାଶିତ

ପ୍ରଣବ ଧ୍ୱନୀରେ ବେଦ ବେଦାନ୍ତରେ

    ସର୍ବଘଟେ ପରିବ୍ୟାପ୍ତ

ସର୍ବ ନାମେ ସେହି ସର୍ବ ଧାମେ ସେହି

  ସର୍ବ ଧର୍ମ ସମାହିତ ॥୧॥

ସେହି କୃପାସିନ୍ଧୁ ସେହି ଦୀନବନ୍ଧୁ 

   ଅନାଥର ସେହି ନାଥ

ସଗୁଣ ନିର୍ଗୁଣ କାରଣ ତାରଣ

    ସେହି ଅନାଦି ଅନନ୍ତ

ମଜ୍ଜିଲେ ତା ଭାବେ ତରିବୁ ଏ ଭବେ

   ସେହି ଏକା ମୁକ୍ତି ପଥ॥୨॥