ଚଉପଦୀ -୧୧ ( ପ୍ରୀତିର ଡୋର)

କେଳି କଳା କୁଶଳା ଚଞ୍ଚଳା ଚଟୁଳ ଚାଲିରେ ତୋର

ରାଜହଂସୀ ଗମନୀ ହଂସିନୀ ଗମନେ ଫୁଟଇ ଫୁଲ

ନୀଳ କଇଁ ନୟନୀ କାମିନୀ ଦାମିନୀ କେଡେ ସୁନ୍ଦର

କୁଞ୍ଜେ ରଞ୍ଜେ କଦମ୍ବ ବନାନୀ ଶ୍ରାବଣୀ କଦମ୍ବ ଫୁଲ ।।

ମୁନି ମନ ହାରିଣୀ ଅପ୍‌ସରୀ ସୁନ୍ଦରୀ ପ୍ରେମ ନଉକା

ପ୍ରଣୟ ନୀର ନିଧି ତାରଣେ ସୁଦକ୍ଷ ପରି ଚାରିକା

ପ୍ରୀତି କରୁଣା ବାରି ଦେ ଢାଳି ଛଇଳୀ କାମଦେବର

ଫୁଲ ଶର ଅନଳ ଜ୍ଵଳନ ବିକଳ ହେଉ ଲୋ ଦୂର ।।

ପ୍ରୀତି କୁଞ୍ଜରେ ସଖୀ ଚଞ୍ଚଳ ମୃଗାକ୍ଷୀ ଚନ୍ଦ୍ର ବଦନା

ଦୁଧ ଅଳତା ମିଶା ରଙ୍ଗିଣୀ ମାନିନୀ ବର ବରନା

କୃଷୋଦରୀ ରୁଚିର ସିଂହ କଟି ତୋର କି ମନୋହର

ଚୋରାଇ ନିଏ ମନ ତୁକି ଇନ୍ଦ୍ରଜାଲ ପ୍ରୀତିର ଡୋର ।।

ତୋ ଆଭା କ୍ଷଣପ୍ରଭା ଦିଶେ ମନଲୋଭା ରତି ଶେଖରୀ

ରତି ନିପୁଣା ଧନୀ ପିନ ଉରଜାରେ ନବ କିଶୋରୀ

ପ୍ରଫୁଲ୍ଲ ଫୁଲ ଶର ମାରଇ କନ୍ଦର୍ପ କିଆଁ ଉଛୁର

କରୁଛୁ ଦିଅ ଧରା ରେ ପ୍ରେମ କୁଶଳା କର ଉଦ୍ଧାର ।।