ଚାଷୀ ଭାଇର ଦୁଃଖ
ଚାଷୀ ଭାଇର ଦୁଃଖ
ଚାଷୀ ଭାଇଟିଏ ଯାଇ ବିଲକୁ ସଅଳ
ଆନନ୍ଦରେ ଗୀତ ଗାଇ କରୁଥାଏ ହଳ ।
ସହସା ଘୋଟି ଗଗନେ ଅନ୍ଧାର ଆଛନ୍ନ
କରି ବରଷାର ଧାରା ସହିତ ପବନ ।
କରିଣ ପ୍ରଖର ଗତି ହେଲା ତୀବ୍ର ବୃଷ୍ଟି
ଚଉଦିଗ ଅନ୍ଧାରରେ ନଦିଶିଲା କିଛି ।
ତୁହାକୁ ତୁହା ପବନ ସହିତରେ ଝଡି
ମାଡି ଆସି ଚାହୁଁ ଚାହୁଁ ଗଲା ବେଗ ବଢି ।
ବିଲ ହୁଡାରେ ବଳଦ ଲଙ୍ଗଳକୁ ବାନ୍ଧି
ଜୁଆଳିକୁ ଥୋଇ ଛତା ଧରି ହେଲା ଧନ୍ଦି ।
ବାଲି ଧୂଳି ଝଡୁ ରକ୍ଷା ପାଇବା ପାଇଁକି
ଉଚ୍ଚା ଜାଗା ଠାକୁ ଗଲା ବେଗେ ସେ ଧାଇଁ କି |
ସାଇଁ ସାଇଁ ପବନରେ ଉଡି ଯାଏ ଛତା
ଗୋଟା ପଣେ ସାରା ଦେହ ହୋଇଲାଣି ଓଦା ।
ଘୋଅ ଘୋଅ ବାତିଆର ସୁଉ ସୁଉ ରବ
ମୁଷଳ ଧାରାରେ ମେଘ କୁଟେ ଟବ ଟବ ।
ବହି ଆସେ ବେଗେ ବେଗେ ହେମାଳ ପବନ
ଶୀତ ହେତୁ ଦେହ କମ୍ଫି ଯାଏ ଘନ ଘନ
ଭିଜିବାରୁ ଓଜନିଆ ଅଙ୍ଗର ବସନ ।
ଚିକିମିକି ସୁଚମକେ ମାରଇ ବିଜୁଳି
ଘନଘନ ଏଣେ ତେଣେ ପଡେ ଘଡଘଡି ।
ଚାଇଁଚାଇଁ ଝଲକରେ ଘୁରିଯାଏ ମଥା
କେଡେ ଦୁଃଖମୟ ଆହା ! ତାହାର ଅବସ୍ଥା ।
ଭାବୁଥାଏ ସଙ୍ଗେ ସଙ୍ଗେ ଯିବ ମେଘ ଛାଡି
ଦୁଇ ଘଣ୍ଟା ବିତିଲାଣି ଚାଲିଛି ତ ବଢି ।
ମେଘ ବର୍ଷା ସାଥେ ଆହା ! କେତେ ଲଢି ଲଢି
ବିତାଇବ ବେଳା ଅବା ! ଫେରିବ କିପରି ।
ଭାଳି କେତେ କଥା ମନ ହୁଅଇ ଉଚ୍ଛନ୍ନ
ନାନା ଭୟେ ମନ ହେଉ ଥାଏ ଛନଛନ ।
ଅଚାନକ ଆକାଶ ଯେ ଦିଶିଲା ଫରଚା
କ୍ରମେ ଧୀରେ କମି କମି ଆସିଲା ବରଷା ।
ଚାହୁଁ ଚାହୁଁ ଚଉ ଦିଗ ଦିଶିଲା ଉଜ୍ଜ୍ୱଳ
ନିମିଷକେ ଖରାପଡି ଶୁଖିଲାଣି ଜଳ ।
ବାହାରିଲା ନବ ଆଶା ଆଶ୍ୱାସନା ଲଭି
ଭାଳୁଥାଏ ଏବେ ପୁଣି ବିଲ ମୁଁ ଚଷିବି ।
କେତେ କଥା ଭାଳୁ ଥାଏ ଅନ୍ତରେ ଗୋପନେ
ଅକସ୍ମାନେ ଭାବାନ୍ତର ଘଟିଲା ତା ପ୍ରାଣେ ।
ଆନନ୍ଦ ଆବେଗେ ତା'ର ପଡି ଗଲା ଭଟ୍ଟା
ଦୁର୍ଘଟଣା ଦେଖି ପ୍ରାଣ ହେଲା ହଟହଟା ।
ଦେଖିବା ବେଳକୁ ଯାଇ ବଳଦଙ୍କ ପାଖ
ହତ ହୋଇ ସାରି ଥିଲେ ହୋଇ ବଜ୍ରପାତ ।
କାକୁସ୍ତ ପରାଣେ କୋହେ ଆହତ ହୃଦୟେ
କି ! କରିବି ବୋଲି ଭାଳେ ! ଦୁଃଖ ଦୁର୍ବିସହେ ।
ବାସ୍ତବେ ତ' ମୁହିଁ ଅଟେ ଅତ୍ୟନ୍ତ ଦରିଦ୍ର
ଦାରିଦ୍ର୍ୟର କଷାଘାତେ ପୀଡିତ ଅତନ୍ଦ୍ର ।
ତା' ଉପରେ ଆଜି ପୁଣି ଏପରି ଦୁର୍ଦ୍ଦଶା
କି ! ହେବ ମୋହର ଏବେ ଭବିଷ୍ୟ ଅବସ୍ଥା ।
କା ନିକଟେ ବଖାଣିବି କିଏବା ଶୁଣିବ
ଭାଳି ହୁଏ କେତେ କଥା ଆହାରେ ଦଇବ !!!
କି ! ଦୁର୍ଦ୍ଦିନେ ଆଣି ମୋତେ କଲୁ ଉପନୀତ
ମୋତେ ନ ମାରି କି କିପାଁ ୟାଙ୍କୁ କଲୁ ହତ ??
ଏ ଦୁର୍ଦ୍ଦିନେ କିଏ ମୋର ହୋଇବ ସହାୟ
ଋଣ ଭାରେ ପ୍ରପୀଡିତ ମୁହିଁ ଅତିଶୟ ।
କାହା ପାଖେ ମୁଁ ଗୁହାରୀ କରିବି ବା କହ
ପୁଣି ଆଜି ଅଚାନକ ଏ ଦଣ୍ତ ଦୁର୍ବହ ।
ଦଇବର ଅତ୍ୟାଚାର ପ୍ରକୃତିର କୋପେ
ଜୀଇଁବେ କିପରି ମୋର ପରିବାର ଲୋକେ ।
କାହିଁ ବା କଅଣ ବିକି ଭାଙ୍ଗି ପକାଇବି
ଅବା ଏବେ ଠାରୁ କିବା ଚାଷ ମୁଁ ଛାଡିବି ।
ଭାଳି ଭାଳି ବାହୁନେ ସେ ବସି ସେହି ଠାବେ
ଆହା ! କେତେ ଦୁଃଖ ମୁଁହି ମୁଣ୍ଡାଇ ବି। ଏବେ ।
ପ୍ରଚଣ୍ତ ମଧ୍ୟାହ୍ନେ ଚଣ୍ତ ରଶ୍ମି ପ୍ରତାପରେ
କ୍ରମେ କ୍ରମେ ମୁଣ୍ତ ତାର ବୁଲାଇଲା ଖରେ ।
ତା' ପର ର କଥା ଆଉ କହି ନ ଯୋଗାଇ
ଧନ ଧାନ୍ୟ ହୀନ ଦୁଃଖୀ ସେହି ଚାଷୀ ଭାଇ ।