ବର୍ଷା ମୋ' ପ୍ରେମିକା
ବର୍ଷା ମୋ' ପ୍ରେମିକା
ପ୍ରେମର ପ୍ରେମିକା ସ୍ମୃତି ସ୍ମରଣିକା
ସପନ ସୁନ୍ଦରୀ ବର୍ଷା
ମେଘ ମାଳା ସୁତା ଜୀବନ ସଙ୍ଗୀତା
ଭରିଛି ମୋ' ମନେ ଆଶା ।
ବରଷା ପ୍ରେମକୁ କରିଛି ଭରସା
ମର୍ତ୍ତ୍ୟ ମଣ୍ଡଳରେ ରହି
ନିଆରା ପ୍ରେମିକ ପ୍ରେମ ମୋ'ର ସ୍ଵଚ୍ଛ
ଆବିଳତା କିଛି ନାହିଁ ।
ମୋ'ପ୍ରେମ ସ୍ଵରୂପା ଇନ୍ଦ୍ରାଣୀ ସମ୍ପଦା
ପ୍ରେମର ଜ୍ଜ୍ଵଳନ୍ତ ଛବି
ଅମୃତ ବାରିଧି ସମର୍ପଣେ ମତି
ସ୍ନେହ ପ୍ରେମ ଅନୁଭବି ।
କଳା ମେଘ ମାଳା ସ୍ଵଭାଵେ ଚଂଚଳା
ମର୍ତ୍ତ୍ଯେ ଆସେ ସରାଗରେ
ସଵୁଜିମା ସାଥୀ ସାଜେ ମୋ ' ସୁନ୍ଦରୀ
ସମର୍ପଣ ଭାବନାରେ ।
ପ୍ରେମ ନୀରେ ପୂର୍ଣ୍ଣ ହୃଦୟ ସଂପୁର୍ଣ୍ଣ
ଅଜାଡେ଼ ଅଜସ୍ର ପ୍ରେମ
ଦେହ ମନ ପ୍ରାଣେ ଭାଵ ସେ' ସଞ୍ଚାରେ
ଦୂର ହୁଏ ସଵୁଭ୍ରମ ।
ସାରା ପୃଥିବୀଟା ଝୁରଇ ସର୍ବଦା
ଆସନ୍ତା କି ଆଜି ବର୍ଷା
ଅନିନ୍ଦ୍ୟ ସୁନ୍ଦରୀ ସ୍ମୃତି ପ୍ରିୟା ରାଣୀ
ଆହା କି ତା' ମିଠା ବାସ୍ନା ।
ରିମଝିମ ସ୍ଵର ଶବଦ ତାହାର
ସଙ୍ଗୀତର ସାତସୁର
ଭିଜାଭିଜା ଦେହ ଅସରନ୍ତି ସ୍ନେହ
ପ୍ରେମ କରେ ନିରନ୍ତର ।
ପ୍ରେମ ପାଟରାଣୀ ଧରିତ୍ରୀ ମା' ସଙ୍ଗୀ
ସମ୍ପର୍କର ଚିରସ୍ମୃତି
ସବୁଜିମା ଛିଟା ଲଗାଏ ସହସା
ନିଆରା ଏ'ଭାବ ପ୍ରୀତି ।
ବରଷକୁ ଥରେ ଆସେ ଶାଶୁ ଘରେ
ଚର୍ତୁଃମାସେ ପାଶେ ରହେ
ପ୍ରେମର ବାରିଧି ଗଲେ ତା'ର ସରି
ଫେରି ଯିବି ବୋଲି କହେ ।
ମଥାରେ ଓଢ଼ଣି ହୀରା ମୁକ୍ତାମଣି
ରୂପେ ଗୁଣେ ପରିପୂର୍ଣ୍ଣା
ଅନନ୍ୟ ସୁନ୍ଦରୀ ତ୍ରିପୁର ବିଜୟୀ
ବିଭବ ତୋ' ଜଳବର୍ଣ୍ଣା ।
ତୋ'ପ୍ରେମେ ବିମୁଗ୍ଧ ହୋଇଛି ମୁଁ' ସତ
ପାଶୋରି ପାରୁନି ମନୁ
ଦେ' ତୁ ଭିଜେଇ ପ୍ରେମ ନୀର ଢାଳି
ସାଜିବି ତୋ' ପ୍ରିୟ ଜାନୁ ।