ବରଷା ଦିନଟି ଲାଗେ

ଗୀତି-କବିତା-

ବରଷା ଦିନଟି ଲାଗେ ସିନା ଭିଜା ଭିଜା,

ତୁମପାଇଁ ମୋ ପାଇଁ ଏଇ ପାଗ ମଜା |(ଘୋଷା)

ଦେଖ ଯମୁନା କୂଳରେ ଫୁଟିଛି କଦମ୍ବ,

ପ୍ରକୃତି ପୁରୁଷ କଲେ ପ୍ରେମର ଆରମ୍ଭ |

ତରୁଲତା ମଞ୍ଜି ଏବେ ହୋଇଲେଣି ଗଜା |

ବରଷା ଦିନଟି ଲାଗେ ସିନା ଭିଜା ଭିଜା |(1)

ମୟୂର ନାଚୁଛି ନଭେ କଳାମେଘ ଦେଖି,

ବିଜୁଳି ଚମକେ ସାଥେ ଇନ୍ଦ୍ରଧନୁ ଡାକି |

ମିଳନ ବେଳାରେ ବାଜେ ଘଡ଼ଘଡ଼ି ବାଜା |

ବରଷା ଦିନଟି ଲାଗେ ସିନା ଭିଜା ଭିଜା |(2)

ଝିପିଝିପି ଶବଦରେ ମେଘ ଗାଏ ଗୀତ,

ସେ ଶବଦେ ତନୁ-ମନ ହୁଏ ଶିହରିତ |

ବରଷାରେ ଭିଜିବାକୁ ସାଥୀଟିଏ ଖୋଜା |

ବରଷା ଦିନଟି ଲାଗେ ସିନା ଭିଜା ଭିଜା | (3)