ବର୍ଷା ଆସିଲା ବୋଲି
ବର୍ଷା ଆସିଲା ବୋଲି
ବର୍ଷା ଖୋଜୁଥିଲା ହଜିଲା ସପନ
ଛାତି ଖୋଜୁଥିଲା ପ୍ରୀତି
ଝାଞ୍ଜି ଖୋଜୁଥିଲା ମେଘର ପଣତ
ଆଖି ଖୋଜୁଥିଲା ରାତି I
ମନେ ଦ୍ୱନ୍ଦ୍ୱ ଥିଲା ମିଳିବକି ନାହିଁ
ତଥାପି ମାଗିଲି ଦିନେ
ଅସରା ପ୍ରେମର ପସରା ଖୋଲିଲ
ଭିଜିଗଲି ମନେ ମନେ I
ପ୍ରୀତିର ପୀୟୁଷ ମଥାରେ ଢାଳିଲ
ଦିନରେ ଉଇଁଲା ଜହ୍ନ
ଉଡନ୍ତା ମନକୁ ପଣତେ ବାନ୍ଧିଲ
ଦେଖାଇଲ କେତେ ସ୍ୱପ୍ନ I
ଭଙ୍ଗାମନ ତଳେ ତୁମରି ପ୍ରେମର
ଲହଡି ଆସିଲା ମାଡି
ଆଶ୍ରାହୀନ ଆଉ ହେଲି କେତେବେଳେ
ତୁମେ ନେଇଥିଲ ଭିଡି I
ମନ ଖୋଜୁଥିଲା ମୁଠାଏ ମହକ
ତୁମେ ବିଞ୍ଚିଦେଲ ବାସ
ଆଖି ଖୋଲି ଯେବେ ଦେଖିଲି ତୁମକୁ
ମୁହଁରେ ଫୁଟିଲା ହସ I
ମୂକକୁ କରିଲ ବାଚାଳ ଲୋ ସଖୀ
ପୂର୍ଣ୍ଣକଲ ଶୂନ୍ୟସ୍ଥାନ
ଅଜାଣତେ ମୋର ତୁମ ମନ ସହ
ମିଶାଇ ଦେଲି ମୋ ମନ I