ବନ୍ଧୁ

ପ୍ରିୟ ସାଥି ବନ୍ଧୁ ସୁଖ ପ୍ରଦାୟକ

ସମ୍ବେଦନ ସ୍ନେହଶୀଳ

ଦେଖିଦେଲେ ମୁହଁ ପ୍ରକୃତ ବନ୍ଧୁର

ମନ ହୁଏ ସୁଶୀତଳ ।

ପ୍ରସ୍ଫୁଟିତ ହୁଏ ହୃଦୟ ଆବେଗ

ସଦ୍ଭାବନା ସୁବିଶ୍ବାସ

ଫୁଲ ପରି ଲାଗେ ମନଟି ହାଲୁକା

ମୁହଁରେ ଫୁଟଇ ହସ ।

ବିତଇ ସମୟ ହାସ୍ୟ କଉତୁକେ

ନିବିଡ଼ ଆତ୍ମବନ୍ଧନ

ଭାବ ଅନୁଭବେ ନିଃସ୍ଵାର୍ଥପର

ସାଧୁତା ବନ୍ଧୁ ଲକ୍ଷଣ ।

ଆପଦ ବିପଦେ ସୁଖ ଅବା ଦୁଃଖେ

ବନ୍ଧୁ ଦେଇଥାଏ ବଳ

ବନ୍ଧୁ ବିନା ଲାଗେ ସ°ସାର ଅସାର

ପ୍ରିୟ ବନ୍ଧୁ ଆପଣାର ।

ଆଶାର ଦ୍ୟୋତକ ପ୍ରାଣ ଉଦ୍ଦୀପକ

ବନ୍ଧୁତା ପ୍ରେମ ସୁନ୍ଦର

ହୃଦୟ ମନକୁ କରେ ଏକାକାର

ପର ହୁଏ ଆପଣାର ।

ଜୀବନର ପଥ ସରଳ ସୁଗମ

ହୋଇଥାଏ କୁସୁମିତ

ଥିଲେ ବନ୍ଧୁ ପାଶେ ବାଧା ପ୍ରତିବନ୍ଧ

ହେଳେ ହୁଏ ନାଶହ୍ରାସ ।

ବଢୁ ସୁସମ୍ପର୍କ ନିବିଡ଼ ବନ୍ଧୁତା 

ଆଖି ଖୋଜି ବୁଲୁଥାଏ

ଅହୋ ଭାଗ୍ୟବାନ ମଣ ଲାଭ କଲେ

ବନ୍ଧୁ ପରି ବନ୍ଧୁଟିଏ ।

  -----