ବିପ୍ଳବୀ ବୀର ସୁରେନ୍ଦ୍ର ସାଏ

ଓଡ଼ିଶା ମାଟିର ବୀର ସୁପୁତ୍ର ହେ

ସୁରେନ୍ଦ୍ର ନାମରେ ଖ୍ୟାତ

ଏ ମାଟିର ଗର୍ବ ଜାତିର ଗୌରବ

କୀର୍ତ୍ତି ତୁମ ପରିବ୍ୟାପ୍ତ l

ସମ୍ବଲପୁରର ଖିଣ୍ଡା ଗ୍ରାମେ ଜନ୍ମ 

ପିତା ତୁମ ଧର୍ମସିଂହ

ସାତ ଭାଇ ମଧ୍ୟେ ତୁମେ ଜ୍ୟେଷ୍ଠ ପୁତ୍ର

ଶତ୍ରୁକୁ ନଥିଲା ଭୟ l

ସାରା ଓଡ଼ିଶାରେ ଫିରିଙ୍ଗି ଶାସନ

ଭୟରେ ଥରିଲେ ଲୋକେ

ସମ୍ବଲପୁରରେ ପଶିପାରିଲେନି

ବୀର ସୁରେନ୍ଦ୍ରଙ୍କ ଡାକେ l

ବିପ୍ଳବର ବୀଜ ବୁଣି ଦେଇଥିଲ

ଛତ୍ରେ ଛତ୍ରେ ଆହ୍ୱାନରେ

କି ମନ୍ତ୍ର ଥିଲାକି ଭାଇ ବନ୍ଧୁ ସବୁ

ମେଳି କଲେ ସଦର୍ପରେ l

'ବାର ପାହାଡ଼ର' 'ବାରଗୁମ୍ଫା'ଠାରେ

ରହିଲ ସେନାଙ୍କ ସହ

ଜାଣିଲେ ଇଂରେଜ କଲେ ପ୍ରତିବାଦ

ଲଢ଼େଇରେ ଭୟାବହ l

ଦେଶଭକ୍ତ ସେଠି ବଳଭଦ୍ର ଦାଓ

ଦେଶ ପାଇଁ ଦେଲେ ପ୍ରାଣ

ହତ୍ୟାକରି ତାଙ୍କୁ ଫିରିଙ୍ଗି ସୈନିକ

ଦେଖାଇଲେ ବହୁ ଟାଣ l

ରାଗିଲେ ଭୀଷଣ ସୁରେନ୍ଦ୍ର ସାଏଙ୍କ

ବିରାଟ ବିଦ୍ରୋହୀ ସେନା

ବ୍ରିଟିଶ ଶାସକ କଳିନେଲେ ବଳ

ବିଦ୍ରୋହ କରିବା ମନା l

ମୁହାଁମୁହିଁ ହେଲେ ଫିରିଙ୍ଗି ସହିତ

ସୁରେନ୍ଦ୍ରଙ୍କ ଅନୁଗାମୀ

ଅନେକ ବରଷ ଲଢ଼େଇ ଚାଲିଲା

ଯୁଦ୍ଧରେ କମ୍ପିଲା ଭୂମି l

ସମ୍ବଲପୁରର ପ୍ରତି ଗ୍ରାମେ ଗ୍ରାମେ

ଶତ୍ରୁକଲେ ଜଳାପୋଡ଼ା

ଘଞ୍ଚ ଅରଣ୍ୟରେ ''ଦେବ୍ରୀଗଡ଼ 'ଦୁର୍ଗେ

କଲ ତୁମେ ମହା ଅଡ୍ଡା l

ଫିରିଙ୍ଗି ସହିତ ଲଢ଼େଇ କରିକି

ଯୁଦ୍ଧବନ୍ଦୀ ହୋଇ ଥିଲ

ଛତିଶି ବରଷ ଲଢ଼ି ଲଢ଼ି ତୁମେ

ଦୁଃଖରେ ମୃତ୍ୟୁ ବରିଲ l

ମାତୃଭୂମିର ସ୍ୱରାଜ ପାଇଁକି

ସହିଥିଲ ବହୁ କଷ୍ଟ

ଅଠରଶ ଚଉରାଅଶୀ ମାର୍ଚ୍ଚ ଅଠେଇଶି

ଛାଡ଼ିଲ ଶେଷ ନିଃଶ୍ୱାସ l

ମାଟିର ମଣିଷ ମାଟିରେ ମିଶିଲ

କରିଲ ଜୀବନ ଧନ୍ୟ

ଦେଶ ମାତୃକାର ସ୍ୱାଧୀନତା ପାଇଁ

ବିସର୍ଜିଲ ନିଜ ପ୍ରାଣ l

ଆଜି ପୁଣ୍ୟ ତିଥି ବାଢୁଛି ଏ ଜାତି

ତବ ପଦେ ଶ୍ରଦ୍ଧାଞ୍ଜଳି

ତୁମ ବୀରତ୍ୱର ବୈଭବ ବୈଶିଷ୍ଟ୍ୟ

କିଏ ବା ପାରିବ କଳି l