ବିବର୍ତ୍ତନ

ନୀଳ ଆକାଶ ତଳେ ଘନ ସବୁଜିମାରେ 

ମାଟି ରାସ୍ତାର ଗଳି କନ୍ଦିରେ 

ଚାଳ ଛାତ, ମାଟି କାଦୁଅ ଘରେ

ନାନା ଅନୁଭୂତି ଅଛି ପିଲା ଦିନରେ ।

ଛୋଟ ସିନା ଉଚ୍ଚତା ତା'ର

ଆନନ୍ଦ ସେଠି ଅତି ମଧୁର 

ଶାନ୍ତିପୂର୍ଣ୍ଣ ତା'ର ନିଆରା ଅନୁଭବ 

ସ୍ଥିରତା ପୁଣି ତା'ର ସୁନ୍ଦର ଆଭୁଷଣ ।

ବଡ କାମ କିଛି କରିବି ବୋଲି

ଗାଁ ମାଟିରୁ ଦୂରକୁ ଗଲି

କେଜାଣି କେତେ ବଡ ହେଇଗଲି ଯେ,

ଗାଁ ମାଟିକୁ ହିଁ ପର କରିଦେଲି ।

ବଡ ସହରରେ କେତେ ଉଚ୍ଚ ଉଚ୍ଚ ଘର

ହେଲେ ଦିଶୁନାହିଁ ସେ ଆଉ ସବୁଜ ସୁନ୍ଦର 

ଉନ୍ନତି ବଳେ ମିଳୁଥିଲେ ହେଁ ବିଜୟର ଉତ୍ତର,

ସନ୍ଦେହରେ ଏବେ ମଧ୍ଯ ନାନା ପ୍ରଶ୍ନ ବିବେକର ।