ଭକ୍ତି ଅର୍ଘ୍ୟ- ୫

ସତ୍ତ୍ଵମୟ ତୁମେ ତତ୍ତ୍ଵ ମୟ ତୁମେ

ତୁମେ ପ୍ରୀତିମୟ ଶ୍ୟାମ

ତୁମେ ନିରାକାର ତୁମେ ବି ସାକାର

ତୁମେ ଅଟ ପରଂବ୍ରହ୍ମ ।

ତୁମେ ସତ୍ତାମୟ ତୁମେ ଗୀତି ମୟ

ଛନ୍ଦ ମାଧୁର୍ଯ୍ୟରେ ଭରା

ଗୀତ ଗୋବିନ୍ଦର ଛନ୍ଦେ ବାନ୍ଧି ହୁଅ

ତୁମେ ସଂଗୀତର ଧାରା ।

ତୁମେ ଭାବମୟ ତୁମେ ଛନ୍ଦ ମୟ

ଭାବମୟ ତୁମ ସ୍ଥଳ

ଭାବ ବିନୋଦିଆ ହେ କଳା ଠାକୁର

ଭବ୍ୟ ତୁମରି ମନ୍ଦିର ।

ଏ ଭବ ସାଗରେ ତୁମେ ତ ନାଉରୀ

ତୁମ ବିନା ମୁକ୍ତି ନାହିଁ

ଗତି ମୁକ୍ତି ଦାତା ହେ କଳା ଠାକୁର

ତୁମେ ଜଗତର ପାଇଁ ।

ତୁମେ ତତ୍ତ୍ଵ ମୟ ତୁମରି ତତ୍ତ୍ଵରେ

ମାନବତା ବାଦ ଭରା

ମାନବୀୟ ଲୀଳା କର ହେ ଠାକୁର

ଧନ୍ୟ ତୁମ ଲୀଳା ଖେଳା ।

ଧନ୍ୟ ସେ ଦେଉଳ ଧନ୍ୟ ନୀଳାଚଳ

ଧନ୍ୟ ପତିତପାବନ

ଧନ୍ୟ ସେ ପାହାଚ଼ ଧନ୍ୟ ବେଢା କ୍ଷେତ୍ର

ଧନ୍ୟ ସେ ଛଡ଼ା ଚନ୍ଦନ ।

ଧନ୍ୟ ମହାପ୍ରଭୁ ଧନ୍ୟ ତୁମ ଲୀଳା

ଧନ୍ୟ ସେଇ ଶଙ୍ଖକ୍ଷେତ୍ର

ଦେଖିଦେଲେ ଥରେ ପାପ କ୍ଷୟ ହୁଏ

ଏ ନେତ୍ର ହୁଏ ପବିତ୍ର ।