ବାପା

ଉପରକୁ ସିଏ ରାଗର ସୂରୁଜ

ଭିତରେ ଶାନ୍ତିର ଜହ୍ନ

ବଂଶ ବୁନିଆଦି ଗୁଣବତ୍ତା ସୂତ୍ରେ

ଆଲୋକ ବର୍ତ୍ତିକା ଚିହ୍ନ !

ଏଇ ପରିବାର ମହାଦ୍ରୁମ ସତେ

ଲାଳନ ପାଳନ ଛୁଆ

ଖରା ବର୍ଷା ଶୀତ ସର୍ବ ଦୁଃଖ ସହି

ବାପା ଯେ ସୁଖର ଦୁଆ !

ଆଶିଷର ସିଏ ଲମ୍ବାହାତ ଗୋଟେ

ହୃଦୟ ମୁକୁଳା ହାସ୍ୟ

ଜୀବନ ଶ୍ରେଣୀରେ ଗୁରୁ ଗଉରବ

ଶିକ୍ଷାର ପ୍ରେରଣା ଶିଷ୍ୟ !

ପୁଣ୍ୟର ମନ୍ଦିରେ ଚଳନ୍ତି ଠାକୁର

ସୁଦୟ ପ୍ରକାଶ ପ୍ରାଣ

ସତ୍ୟର ନିଷ୍ଠାରେ ନିତ୍ୟର ବନ୍ଦନା

ବିଶେଷ ଦୁର୍ଲଭ ଗୁଣ !

ଆଶ୍ବାସର ପୁଣି ନିଃଶ୍ବାସ ପ୍ରଶ୍ବାସ

ଶୋଣିତ ଧାରାର ସ୍ନେହ

ପିତୃ ପୁରୁଷର ସନାତନୀ ଆସ୍ଥା

ଅଭୁଲା ସ୍ମାରକ ମୋହ !