ଶ୍ରୀ ରାମନବମୀ

ପୁରୁଷ ଉତ୍ତମ  ପ୍ରଭୁଯେ ଶ୍ରୀରାମ

ସୂର୍ଯ୍ୟବଂଶୀ ଅଧିପତି

ସମାଜ କଲ୍ୟାଣ ମର୍ତ୍ତେ ଆଗମନ 

ରଘୁବଂଶୀ ସୀତା ପତି ll

ଅଯୋଧ୍ୟା ନଗର  ରାଜା ଅଧିଶ୍ୱର

ଛତ୍ରପତି ଦଶରଥ

ବିହୁନେ ସନ୍ତାନ  ସନ୍ତାପିତ ପ୍ରାଣ 

ଚିନ୍ତନେ ମନ ବ୍ୟଥିତ ll

ଉଦ୍ଦେଶ୍ୟେ  ଶିକାର ଶବ୍ଦଭେଦୀ ଶର

 ବଦ୍ଧେ ଶ୍ରବଣ କୁମାର

ଅନ୍ଧ ପିତା ତାର କୋପେ ଥର ଥର

ଅଭିଶାପ ଭୟଙ୍କର ll

ଶୋକରେ ଅଧୀର  ପ୍ରାଣ ଯିବ ତୋର

ଶାପ ହେଲା ଆଶୀର୍ବାଦ

ରାଜା ଦଶରଥ ପାଇଗଲେ ପଥ

ବଶିଷ୍ଠ ପାଶେ ଆଶ୍ରିତ ll

ନେଇ ପରାମର୍ଶ   ଗୁରୁଙ୍କ ଆଶିଷ

ରୁଷ୍ୟ ଶୃଙ୍ଗ ମୁନିବରେ

ପୁତ୍ରେଷ୍ଠି ଯଜ୍ଞରେ  ଚରୁଯେ ବାହାରେ

ଖାଏ ରାଣୀ ଆନନ୍ଦରେ ll

ଶୁକ୍ଳ ଚୈତ୍ର ମାସ ପବିତ୍ର ଦିବସ

ପୁଣ୍ୟତିଥି ନବମୀର 

ବସନ୍ତ ଋତୁରେ ଏଧରା ଧାମରେ

ଜନ୍ମ ପ୍ରଭୁ ରାମଙ୍କର ll

ସପ୍ତମେ ଶ୍ରୀରାମ  ସାର ରାମ ନାମ

ବିଷ୍ଣୁଙ୍କର ଅବତାର

ତ୍ରେତୟା ଶେଷରେ ଧର୍ମର ମାର୍ଗରେ

ଲୀଳାଖେଳା ପ୍ରଭୁଙ୍କର ll

ବିଦ୍ୱାନ ରାବଣ  ଜାଣିତା ମରଣ

ଦଶରଥେ ବୀର୍ଯ୍ୟ ହରେ

ଗର୍ବେ ଲଙ୍କେଶ୍ୱର ବିଜୟୀ ତ୍ରିପୁର

ବିଶ୍ୱଜୟୀ ଅହଂକାରେ ll

ରାବଣ ମରଣ   ରାକ୍ଷସ ଦମନ

ରାମଙ୍କର ମହାନତା

ସତ୍ୟ ଧର୍ମ ନିଷ୍ଠା କର୍ମେ ପରାକାଷ୍ଠା

ରାମଚନ୍ଦ୍ର ଆଦର୍ଶିତା ll

ସେବା ପିତୃ ମାତୃ  ମୈତ୍ରୀ ସ୍ନେହ ଭାତୃ

ପ୍ରଜାପ୍ରେମେ ଦେଶ ଭକ୍ତି

ରାମ ନାମେ ଶକ୍ତି  ହୃଦେ ମିଳେ ଶାନ୍ତି

ନାମ ଜପେ ମିଳେ ମୁକ୍ତି ll