ବାଇ ବସା ନଷ୍ଟ ନ ହେଉ

ବାଇ ଚଢ଼େଇ ମା',ବସା ଭିତରେ ଶାବକ

ପ୍ରତି ମୁହୂର୍ତ୍ତରେ ବିପଦ ରହିଛି

ଆମ ବସା ଏ ମଣିଷଙ୍କ ପାଇଁ କୌତୁକିଆ

ଚାହୁଁ ଚାହୁଁ ଟାଣି ଓଟାରି ନେଉଛି ।

ମୋତେ ହିଁ ସୁରକ୍ଷା ପାଇଁ ପ୍ରହରୀ ହେବାକୁ

ଆଜିକାଲି ନିହାତି ପକ୍ଷେ ଜରୁରୀ

ଆମ ଝୁଲା ବାଇ ବସା ସଭିଙ୍କୁ ପସନ୍ଦ

କିଛି ଅପରାଧ ନ କରି ବଇରୀ ।

ଜଣାନାହିଁ କେତେବେଳେ କଣ ଘଟିଯିବ

ଆମ ପାଖେ ସେମିତି ନାହିଁ ସୂଚନା

ଝଡ ଠାରୁ ଭୟଙ୍କର ଏ ମଣିଷ ଜାତି

ଆମ ବସା କରିଦେବ ପିଲାଙ୍କ ଖେଳନା ।

ଆମ ବଂଶଧର ଏହିପରି ବସା ବାନ୍ଧି

ରହୁଥିଲେ ଉଚ୍ଚା ଗଛ ଡାଳରେ

ଝଡ ତୋଫାନ ଦାଉରୁ ରକ୍ଷା ପାଉଥିଲେ

ଧରା ପଡୁଥିଲେ ମଣିଷ ହାତରେ ।

ବାଇ ଚଢ଼େଇ ବସା ପାଇଁ କବିତା ଗୀତ

ଶୁଣି ଅଛି ଥରେ ନୁହଁ,ବହୁ ଥର

ଗପ କହି ମଣିଷ ତା ପିଲାକୁ ଶୁଆଇ

ଆତ୍ମ ତୃପ୍ତି ପାଉଛି ଥର କୁ ଥର ।

ଉଦୁଉଦିଆ ଖରାବେଳେ ସତର୍କ ସହ

ଚାରିଆଡେ ଲକ୍ଷ୍ୟ କରିବା ଜରୁରୀ

ଆଜିକାଲି ଆମ ବାଇ ଚଢେଇ ବସା

ପିଲା ଅବା ବୁଢ଼ା ଶରଧା ସବୁରି ।

ବାଇ ଚଢ଼େଇ ବସାର ତିଆରି କୌଶଳ

ବାଇ ଚଢ଼େଇଙ୍କ ପାଖରେ ସିମୀତ

କେତେ ପରିଶ୍ରମ ପୁଣି ସାମଗ୍ରୀ ଯୋଗାଡ

ଉଚ୍ଚା ଗଛ ଡାଳରେ ହୁଏ ନିର୍ମିତ ।

ହେ,ମଣିଷ ଜାତି,ଆମକୁ ସୁରକ୍ଷା ଦିଅ

ଆମ ବସା ଦେଖି ନଷ୍ଟ କର ନାହିଁ

ବସା ଭିତରେ ଆମର ଶାବକ ଅଛନ୍ତି

ତାଙ୍କ ପାଇଁ ଆଖିକୁ ନିଦ ବି ନାହିଁ ।

ବାଇ ଚଢ଼େଇ ବାଇ ହୋଇ ନିର୍ଭୟରେ ରହୁ

ମଣିଷର ଦୟା ଦୃଷ୍ଟି ରହି ଥାଉ

ଏ ନିବେଦନ ସହିତ ପ୍ରାର୍ଥନା କରୁଛୁ

ବାଇ ବସା ଆଉ ନଷ୍ଟ ନ ହେଉ।