ଅସ୍ପୃଶ୍ୟତା ଏକ ଘୃଣ୍ୟ ମାନସିକତା
ଅସ୍ପୃଶ୍ୟତା ଏକ ଘୃଣ୍ୟ ମାନସିକତା
କେତେ ଜନ୍ମ ପୂଣ୍ୟ ସାର୍ଥକ କରିଣ
ପାଇଛୁ ମଣିଷ ଜନ୍ମ,
ବୁଦ୍ଧି ବିବେକରେ କୋଟି ଜୀବ ମଧ୍ୟେ
ମଣିଷର ଶ୍ରେଷ୍ଠ ସ୍ଥାନ ।
ସଚରାଚର ଏ ଜୀବ ଜଗତରେ
ମଣିଷ ଗୋଟିଏ ଜାତି,
ଧର୍ମକର୍ମ ସିନା ଅଲଗା ଅଲଗା
ବେଶଭୁଷା ଓ ପ୍ରକୃତି ।
କର୍ତ୍ତବ୍ୟ ପଥରେ ବୃତ୍ତି ହିତ ପାଇଁ
କୃତ ବିଭାଗ ବଣ୍ଟନ,
ବ୍ରାହ୍ମଣ, କ୍ଷତ୍ରିୟ, ଶୁଦ୍ର, ବୈଶ୍ୟ
କରିଥିଲେ ଜ୍ଞାନୀ ଜନ ।
ହିନ୍ଦୁ, ଖ୍ରୀଷ୍ଟ, ଶିଖ, ମୁସଲମାନ ଯେ
ବୁଦ୍ଧ, ଜୈନ ଆଦି ଧର୍ମ,
ସବୁରି ମୂଳରେ ଏ ବିଭାଜନରେ
ଲକ୍ଷ୍ୟ ଓ ଉଦ୍ଦେଶ୍ୟ କର୍ମ ।
ସୃଷ୍ଟିକର୍ତ୍ତା ଦିନେ କରିଥିଲେ ସୃଷ୍ଟି
ଜୀବର ଶ୍ରେଣୀ ବିଭାଗ,
ଶ୍ରେଷ୍ଠ ଜୀବ ଭାବେ ମଣିଷ ଜାତିକୁ
ଦେଇଥିଲେ ସିଂହ ଭାଗ ।
ତଥାପି ମଣିଷ ବୁଝିପାରୁ ନାହିଁ
ଗ୍ରହି ନାନା କୁସଂସ୍କାର,
ଛୁଆଁ ଅଛୁଆଁର ଭେଦଭାବକୁ ଯେ
କରୁଅଛି ଆପଣାର ।
ଉଚ୍ଚନୀଚ୍ଚ ଆଉ ଛୁଆଁ ଅଛୁଆଁର
ଭେଦଭାବକୁ ମଣିଷ,
ସଦା ସର୍ବଦା ହୃଦୟ ଭିତରୁ
ଦୂର କର ଏହା ବିଷ ।
ଜାଣିରଖ ସର୍ବେ ଅସ୍ପୃଶ୍ୟତା ଅଟେ
ଘୃଣ୍ୟ ମାନସିକତାଟି,
ସମାନ ରକତେ ସମାନ ମାଂସରେ
ଗଢ଼ା ଆମ ଶରୀରଟି ।