ଲାଇବ୍ରେରୀ
ପ୍ରୋଫାଇଲ୍
ଇସ୍ କି ଖୁସି ସେ
ଇସ୍ କି ଖୁସି ସେ
ଭୋକହେଲେ ଆସେ ଦଉଡି ଧାଇଁ ମୁଁ
ମାଆ ବାଢିଦିଏ ଭାତ
ଇସ୍ କି ଖୁସି ସେ ବସିଯାଏ ବେଗେ
ଧୋଇଦେଇ ମୁହଁ ହାତ ।।
ବୁଲିଯିବା ପାଇଁ ବେଳେବେଳେ ମୋତେ
ମାଆ ଦିଏ ସଜ କରି
ଇସ୍ କି ଖୁସି ସେ ନୂଆ ଜାମାରେ ମୁଁ
ଦିଶୁଥାଏ ବାବୁ ପରି ।।
ତାରା ଦେଖିବାକୁ ମନ ହୁଏ ମୋର
କାଖରେ ବସାଏ ମାଆ
ଶୁଣି ତା' ମୁହଁରୁ ମନଭୁଲା ଗୀତ
ଇସ୍ କି ଖୁସି ସେ ଆହା ।।
ଗେଲ କରିଦିଏ ମାଆ ମୋତେ ତା'ର
କୋଳରେ ବସେଇ ଦେଇ
ଇସ୍ କି ଖୁସି ସେ ପିଲାମନ ମୋର
ନାଚିଯାଏ ଥେଇ ଥେଇ ।।
ଶୀତୁଆ ରାତିରେ ନିଦୁଆ ଆଖିରେ
ଶୋଇପଡେ ମାଆ ପାଶେ
ଇସ୍ କି ଖୁସି ସେ ରାତି ସାରା ମୋର
ନିଦରେ ସପନ ଆସେ ।।
ମାଆ ପରି ମୋର ମାଟି ମାଆ କୋଳେ
ଥାଏ ମୁହିଁ ସାଥି ମେଳେ
ଇସ୍ କି ଖୁସି ସେ ସକାଳରୁ ସଂଜ
ନାନା ଜାତି ଖେଳ ଖେଳେ ।।
ପାଦ ତଳେ ମୋର ମାଟି ମାଆ ଥାଏ
ମଥାରେ ମାଆର ହାତ
ସତେ କି ସରଗ ଖସିଛି ମୋ ହାତେ
ଖୁସି ମୋ ଅକାତକାତ ।।
ଯେମିତି ଜୀଇଛି ଯାହା ମୁଁ ପାଇଛି
ମାଆ ମାଟି ମୁହଁ ଚାହିଁ
ଇସ୍ କି ଖୁସି ସେ କଥାରେ ଭାଷାରେ
କହି ମୁଁ ପାରିବି ନାହିଁ ।।
