ଅପାସୋରା ସ୍ମୃତି
ଅପାସୋରା ସ୍ମୃତି
ପ୍ରତି ଫଗୁଣରେ ମନେପଡ଼େ ସାଥୀ
ତୁମ ରଙ୍ଗବୋଳା କଥା
ଅବୀର ଛଳରେ ସିନ୍ଥିରେ ମୋହର
ଦେଇଥିଲ ସିନ୍ଦୂର ଟିପା ।
ବଉଳ ପେନ୍ଥାକୁ ଗଜରା କରିଗୋ
ପିନ୍ଧାଇଥିଲ ମୋ କେଶେ
ପଳାଶ ଫୁଲକୁ ପାଉଁଜି ସଜେଇ
ବାନ୍ଧି ଦେଇଥିଲ ମୋ ପାଦେ ।
ବରଷୁଥିଲା ପ୍ରୀତିର ଶ୍ରାବଣ
ତୁମ କୋଳେ ଥୋଇ ଥିଲି ମଥା
ତୁମେ କହୁଥିଲ ଅଳପ ଅଳପ
ହେଲେ ଜହ୍ନ ପଡ଼ୁଥିଲା ଫିକା ।
ତାରି ମାୟାବିନୀ କୁସୁମ କାମିନୀ
ଲୋଟୁଥିଲା ମୋର ଅଙ୍ଗେ
ମୁଁ ହଜୁଥିଲି ତୁମ ପ୍ରେମ ରାଗେ
ତୁମେ ଲୁଚୁଥିଲ ତାରଙ୍କ ମଧ୍ୟେ ।
ହସି ଖୁସି ସାରା ରାତି
ଉଜାଗରେ ଗଲା କଟି
ଆଖି ଖୋଲା ରଖି ମୁଁ ଯେ
ତୁମରି ସ୍ବପ୍ନ ଦେଖୁଥିଲି ଚେତିଚେତି ।