ପାଦ ପାଉଁଜୀ

ଆମ ଘର ଯେବେ ପହିଲି ହସିଲା

   ତୁମେ ଆସିଥିଲ ନୂଆ 

ତୁମରି ଚାଲିରେ ତୁମ ପାଉଁଜିର

   ଶବ୍ଦେ ଥିଲା ପ୍ରୀତି ଛୁଆଁ |

ଧିରେ ଧିରେ ଯେବେ ତୁମେ ଚାଲୁଥିଲ

   ରୁଣୁ ଝୁଣୁ ଶବ୍ଦ ମୋହେ 

ଅଵଗୁଣ୍ଠନର ତଳେ ତୁମ ମୁହଁ

    ଲାଜେ ପରା ଲୁଚିଥାଏ |

ପାଦ ପାଉଁଜିର ମଧୁର ନିକ୍ଵଣ

   ହୃଦୟେ ଜଗାଏ ପ୍ରୀତି 

କଳ୍ପିତ କାହାର ଏ ପ୍ରୀତି ପସରା

   ବିଭୂଷିତ କରିଅଛି |

ନାରୀ ଦେହେ ଯେତେ ଥାଏ ଅଳଙ୍କାର

    ନିଆରା ପାଦ ପାଉଁଜୀ 

ଶବ୍ଦରେ ତାହାର କେତେ ଯେ କୁହୁକ

    ମନ ଯାଇଥାଏ ହଜି |

ଏକାକୀ ନୀରବେ ପ୍ରତୀକ୍ଷାର ଶେଜେ

    ହୃଦୟ ତୋଳେ ଯନ୍ତ୍ରଣା 

ପାଦ ପାଉଁଜିର ଶବଦେ ପ୍ରୀତିରେ

    ମନ ହୁଏ ଆନମନା |

ଭରି ଯେ ରହିଛି ସେ ଶବଦ ଧାରେ

    ପ୍ରୀତିଭରା ଆକର୍ଷଣ 

ଆଣିଥାଏ ସଦା ରୋମାଞ୍ଚ ଦେହରେ

    ଭରେ ଆଖିରେ ସପନ |

ନର୍ତ୍ତକୀ ପାଦର ଘୁଙ୍ଗୁର ପରାୟେ

    ବଧୂପାଦେ ଯେ ପାଉଁଜୀ 

ପ୍ରୀତି ସାତସୁର ଝଙ୍କାର ତୋଳେ ସେ

    ମିଳନର ଆଶେ ହଜି |

ଅନାଦି କାଳରୁ ନାରୀର ଭୂଷଣ

    ହୋଇଛି ପାଦ ପାଉଁଜୀ 

ବିମୋହିତ କରେ ପୁରୁଷର ମନ

    ଗୁଞ୍ଜରିତ ଶବ୍ଦରାଜୀ |