ଅନୁପମା

ହସ ତୁମ ସଖୀ ଅମୃତ ପ୍ରାୟ ଲୋ

ରାଗ ତୁମ ଚକ୍ରବାତ

ଅଭିମାନ ତୁମ ଅମୂଲ ମୂଲ ଲୋ

ବିନା ମେଘେ ବଜ୍ରପାତ I

କଣ୍ଠରୁ ତୁମର ଝରୁଥାଏ ସଦା

ମଣି ମୁକୁତାର ହାର

ଦୁଃଖରେ ତୁମର ଆକାଶରୁ ବର୍ଷା

ଝରିଯାଏ ଝରଝର I

ସୁଲଳିତ ସ୍ୱରେ ଗୀତ ଗାଇଦେଲେ

ସଞ୍ଜ ଆସେ ନଇଁ ନଇଁ

ବିପଦ ସଙ୍କେତ ଶୁଭିଯାଏ ସଖୀ

ଦେଖିଦେଲେ ତୁମ ଛାଇ I

ମତ୍ସ୍ୟକନ୍ୟା ପରି ଛନ୍ଦାୟିତ ହୋଇ

ଚାଲ ଯେବେ ଧିରେ ଧିରେ

ତୁମ ପାଦଚିହ୍ନ ଝୋଟି ଆଙ୍କିଦିଏ

ବେଳାଭୂମୀ ଧାରେ ଧାରେ I

ତୁମରି ତୀର୍ଯ୍ୟକ ଚାହାଣୀରେ ସିନା

ଭ୍ରଷ୍ଟହୁଏ ମୁନୀ ମନ

ତୁମରି ଆଖିର ଯାଦୁରେ ଲୋ ସଖୀ

ଆକାଶରେ ଉଏଁ ଜହ୍ନ I

ତୁମପାଇଁ ସଖୀ ଯେତେ ଲେଖିଲେ ବି

ମନ ପୁରେନାହିଁ ଜମା

ତ୍ରିଭୂବନେ ତୁମେ ଅତୁଳନୀୟା ଗୋ

ଅଦ୍ୱିତୀୟା ଅନୁପମା I