ଆଶିଷ ଦେଉଛି ଢାଳି

କୁନି ଛୁଆଟିଏ ହୋଇ ଯେବେ ମୁହିଁ

ଖେଳୁଥିଲି ଏକା-ଏକା ,

ଠାକୁରେ ମୋ କଥା ବୁଝି ଭାଇଟିଏ-

ସହ କରିଦେଲେ ଦେଖା।

କୁଆଁ କୁଆଁ ରାବି ସେଇ କୁନିଭାଇ

ଠାରି କି ଡାକିଲା ମୋତେ ,

ଧାଇଁଯାଇ ତାକୁ ଦେଖିଲି ପରା ମୁଁ

ଆଶ୍ଚର୍ଯ୍ୟ ,ଆନନ୍ଦେ କେତେ ।

ପରିବାର ସାରା ଲୋକଙ୍କ ମୁହଁରେ

ଖୁସି ହେଉଥିଲା ବାରି ,

ପାକେଇ ପାଟିରେ ଆଈମା' ହସିଲା

ବାରବାର କିରି କିରି ।

ଅତି ଆନନ୍ଦରେ ବାଣ୍ଟୁଥିଲେ ବାପା

ପିଲାଙ୍କ ସୁଆଦ ଚିଜ ,

ମୋତେ ଲାଗୁଥିଲା ମୋ ଖେଳିବା ସାଥୀ

ମିଳିଗଲା ପରା ଆଜ ।

ସବୁରି ଆଦର ପାଇ ସେଇଭାଇ

ଛୋଟରୁ ହୋଇଲା ବଡ଼ ,

ସୁଗୁଣରେ ତା'ର ମନ ମୋହିନେଲା

ଆଖପାଖ ଚଉକଡ଼ ।

ପାଠ ଶାଠ ଆ

Advertisement

ଉ କଳା, କୌତୁକରେ

ହୋଇଲା ସେ ଧୁରନ୍ଧର ,

ଗୁରୁଜୀ,ଗୁରୁମା' ଆଶିଷ ଲଭିଲା

ପ୍ରିୟ ସହପାଠୀଙ୍କର ।

ଦେଶସେବାକୁ ସେ ବ୍ରତ କରିନେଇ

ହେଲା ପ୍ରତିରକ୍ଷା କର୍ମୀ ,

ଜୀବନର ମୂଲ୍ୟବୋଧ ସେ ବୁଝିକି

ହୋଇଛି ଅଧ୍ୟାତ୍ମ ଗାମୀ ।

ନିଜ କର୍ମ ଆଉ କର୍ତ୍ତବ୍ୟ ପାଳନେ

ହୋଇକରି ସିଏ ରତ ,

ସୁଯୋଗ ମିଳିଲେ କରିଚାଲୁଅଛି

ଆନଜନଙ୍କର ହିତ ।

ସେ ଭାଇର ଆଜି ଶୁଭ ଜନ୍ମଦିନ

ଆଶିଷ ଦେଉଛି ଢାଳି ,

ରଖିଥା'ନ୍ତୁ ମାଆ ପଣତ ଉହାଡ଼େ

କରୁଅଛି ପାଦେ ଅଳି ।

ବିପଦେ,ଆପଦେ ଧଇର୍ଯ୍ୟ ଦେଇକି

ହେଉଥା'ନ୍ତୁ ସଦା ସାହା ,

ମଣିଷ ଭିତରେ ମଣିଷ ହୋଇକି

ସୁନାଭାଇ କରୁ ନାଆଁ ।

ବି ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ।