Library
Profile
ଆନନ୍ଦମୟୀ ନଗରୀ ଅଯୋଧ୍ୟା
ଆନନ୍ଦମୟୀ ନଗରୀ ଅଯୋଧ୍ୟା
ଆନନ୍ଦମୟୀ ନଗରୀ ଅଯୋଧ୍ୟା
===============
ସରଯୁ ନଦୀର କୂଳେ
ଅତି ମନୋହର ।
ସୂର୍ଯ୍ୟବଂଶ ରାଜଧାନୀ
ଅଯୋଧ୍ୟା ନବର ।।
ନିର୍ମାଣି ଥିଲେ ଯାହାକୁ
ମନୁ ନରପତି ।
କେଉଁ କାଳୁ ରହିଅଛି
ଅକ୍ଷୟ କୀରତି ।।
ଯୁଦ୍ଧରେ ଅଜେୟ ଯେଣୁ
ନାମ ତା' ଅଯୋଧ୍ୟା ।
ସେଠାରେ ଜନମି ଥିଲେ
ମହା ମହା ଯୋଦ୍ଧା ।।
ଚାରିପଟେ ଗଡ଼ ଖାଇ
ମଧ୍ୟରେ ନଗର ।
ଗଡ଼ଖାଇ ଜଳ ମଧ୍ୟେ
କ୍ରୀଡ଼ନ୍ତି ମଗର ।।
ସୁଦୃଶ୍ୟ ତୋରଣ ଶୋଭେ
ପ୍ରବେଶ ପଥରେ ।
ହର୍ମ୍ୟ ଅଟ୍ଟାଳିକା ବଳୀ
ଜନ ମନ ହରେ ।।
ଆଉ କି ବର୍ଣ୍ଣିବି ଶୋଭା
ଅଯୋଧ୍ୟା ନଗରୀ ।
ସଂକ୍ଷେପେ କହିଲେ
ତୁଳନୀୟ ଇନ୍ଦ୍ରପୁରୀ ।।
ଏହିଠାରେ ଜନମୀ
ଈକ୍ଷାକୁ ମହାରାଜା ।
ଈକ୍ଷାକୁ ବଂଶ ଥାପିଲେ
ସୁଖେ ପାଳି ପ୍ରଜା ।।
ତପ ଆଚରିଲେ
ମହାମନା ଭଗୀରଥ ।
ଗଙ୍ଗା ଆଣିଲେ ସ୍ଵର୍ଗରୁ
ଆଶ୍ଚର୍ଯ୍ୟ ଅତ୍ୟନ୍ତ ।।
ତ୍ରିତଳ ଗାମିନୀ ଗଙ୍ଗା
ବହନ୍ତି ଭାରତେ ।
ଭାଗିରଥି ନାମ ତାଙ୍କ
ଜୟ ଭଗୀରଥେ ।।
ଏହିଠାରେ ଜନ୍ମି
ହରିଶ୍ଚନ୍ଦ୍ର ମହାରାଜା ।
ଶ୍ମଶାନ ଜଗିଲେ ଯାଙ୍କ
ନାମେ ବାଜେ ବାଜା ।।
ଦିଲ୍ଲୀପ ନନ୍ଦିନୀ ଗାଭୀ
ଶୁଣିଥିବ ଗାଥା ।
ରଘୁ ଜନ୍ମିଲେ ଦିଲ୍ଲୀପ
ଯାହାଙ୍କର ପିତା ।।
ମହାରାଜା ରଘୁ ଥାପି
ଗଲେ ରଘୁବଂଶ ।
ଗାଥା ଯାହାର ବର୍ଣ୍ଣିଲେ
କବି କାଳିଦାସ ।।
ତାଙ୍କ ପୁତ୍ର ଅଜ ଯାଙ୍କ
ପୁତ୍ର ଦଶରଥ ।
କୀରତୀ ଯାହାଙ୍କ ଅଟେ
ଭୂବନ ବିଦିତ ।।
ଶ୍ରୀରାମ ଜନ୍ମିଲେ
ପୁତ୍ର ଦଶରଥଙ୍କର ।
ବିଷ୍ଣୁ ଅଂଶେ ଖଣ୍ଡିବାକୁ
ଅବନୀର ଭାର ।।
ଭରତ ଶତ୍ରୁଘ୍ନ ଲକ୍ଷ୍ମଣ
ତାଙ୍କର ଭାଇ ।
ଆଜ୍ଞାଧୀନ ପଣେ ଜଗତରେ
ନାହିଁ କେହି ।।
ତମସା ତୀରରେ ବସି
ମହର୍ଷି ବାଲ୍ମିକୀ ।
ରାମ ନାମ ପ୍ରଚାରିଲେ
ରାମାୟଣ ଲେଖି ।।
ମାନସ ଲେଖିଲେ ପୁଣି
ସନ୍ଥ ଶ୍ରୀତୁଳସୀ ।
ପାରାୟଣ କରନ୍ତି ଯା
ଭକ୍ତ ଗଣେ ବସି ।।
ମହାକାବ୍ୟ ରାମାୟଣ
ଗାଥା ପୁଣ୍ୟମୟ ।
ରାମ କଥା ଶ୍ରବଣରେ
ପାପ ଯାଏ କ୍ଷୟ ।।
ସରଜୂ ଘାଟ ଯିବାକୁ
ବଳାଇଛି ମନ ।
ଜୟ ଜୟ ଜୟ ରାମ
କୌଶଲ୍ୟା ନନ୍ଦନ ।।
କେବେ ହେବ ଭାଗ୍ୟ ଯିବି
ତୀର୍ଥ କରି ମୁହିଁ ।
ଆନନ୍ଦମୟୀ ନଗରୀ
ଅଯୋଧ୍ୟାକୁ ଭାଇ ।।
ଆନନ୍ଦେ ସରଯୁ ଜଳ
କରିବି ମୁଁ ପାନ ।
ଦର୍ଶନ କରିବି ଯାଇ,
ଶ୍ରୀରଘୁ ନନ୍ଦନ ।।
ଜୟ ଜୟ ଜୟ ରାମ
ଜୟ ଦାଶରଥି ।
ଜୟ ଜାନକୀ ଭରତ
ଶତ୍ରୁଘ୍ନ ସୌମିତ୍ରି ।।
ନଗରୀ ରକ୍ଷକ ସ୍ଵୟଂ
ବୀର ହନୁମାନ ।
ଶ୍ରୀରାମ ଦୂତଙ୍କ ପଦେ
ମୋହର ଶରଣ ।।
🙏🙏🙏
ଅର୍ଜୁନୀ
--------------
ଅର୍ଜୁନୀ ଚରଣ ବେହେରା
ମୋ -୭୬୯୩୦୯୧୯୭୧
