ଆମ ଗାଆଁରେ ଶୀତ
ଆମ ଗାଆଁରେ ଶୀତ
କାକର ସ୍ନାତ ଜରତୀ ଶୀତ ଆସିଛି ଆମ ଗାଆଁ
ଶିହରି ଉଠେ ପୋଖରୀ ତୁଠେ ଦେହ ଛାଆଁକୁ ଛାଆଁ
ବଗିଚା ଭ୍ରମେ ଫୁଲଙ୍କୁ ଚୁମେ ରଙ୍ଗୋଲି ପ୍ରଜାପତି
କୁହୁଡି ଫାଙ୍କେ ସୁରୁଜ ଆଙ୍କେ ଖୁସି ବର୍ଣ୍ଣାଳି ଝୋଟି ।।
ନଦିଏ ଧରା କଅଁଳ ଖରା ସଅଳ ଯାଏ ଖସି
ଖଳା ଅମାରେ ସାଇତେ ଧିରେ ସୁନା ଫସଲ ଚାଷୀ
ମାଣ ଖଟୁଳି ନୈବେଦ୍ୟ ଥାଳି ଲକ୍ଷ୍ମୀ ପୁରାଣ ଗୀତ
ବିଧି ବିଧାନେ ପର୍ବ ପାଳନେ ମୋ ଗାଆଁ ମୁଖରିତ ।।
ଲହଡି ଭାଙ୍ଗେ ପବନ ସଙ୍ଗେ ସୁନା ସୋରିଷ ଗୋରୀ
ରୂପା ଖରାରେ ଦେହ ପଖାଳେ ଆନନ୍ଦ ମନେ ଭରି,
ବ୍ରାହ୍ମଣୀ ନଇ କୂଳକୁ ଛୁଇଁ ହେମାଳ ବାଆ ବହେ
ହେଁସ କତରା ପଡଇ ଲୋଡା ଶୁଭିଲେ ହୁକେ ହୋଏ..!!
ମୋ ଗାଁ ମନେ ଶୀତ ଯେ ଭରେ ଖୁସିର ସାତରଂଗ
ପ୍ରତି ପ୍ରାଣରେ ଶୀତ ପରଶେ ଅଶେଷ ଅନୁରାଗ ।।