ସଞ୍ଜ ଯେବେ ଆସେ
ସଞ୍ଜ ଯେବେ ଆସେ
ସଞ୍ଜ ଯେବେ ଆସେ ପକ୍ଷୀ ନୀଡେ ଫେରେ
ସୂରୁଯ ବୁଡେ ପଶ୍ଚିମେ
ଜୀବନର ସଞ୍ଜେ ଖୋଜୁଛି ମୁଁ ନୀଡ଼
ହଜିଛି ସଂସାର ଦ୍ରୁମେ ।।
କେବେ ଟାଣ ଖରା କେବେ ମଉସୁମୀ
କେବେ ପୁଣି ପତ୍ରଝଡା
ଆରମ୍ଭରୁ ଶେଷ ଶେଷରୁ ଆରମ୍ଭ
ଆଗମନ ଓ ବାହୁଡା ।।
ଶୀତୁଆ ସଞ୍ଜରେ ଉଷୁମ ଖୋଜଇ
ଜୀବନ ବଣିକ ଭାଈ
ଛାତିତଳ ନିଆଁ ଖୋଜଇ ସାଥୀକୁ
ସଞ୍ଜ ଆସେ ଯେବେ ନଇଁ ।।
ଜୀବନ ସଙ୍ଗୀତ ଅତି ସୁମଧୁର
କାହ୍ନୁର ବଇଁଶୀ ପରି
ସଞ୍ଜ ଯେବେ ଆସେ ସଙ୍ଗାତ ପରଷେ
ପ୍ରିୟା ପ୍ରୀତି ଅସୁମାରୀ ।।