ପିଲାଦିନେ ଫେରିଯିବା
ପିଲାଦିନେ ଫେରିଯିବା
ପିଲାଦିନ ଗଲା ଯୌବନ ସରିଲା
ଜଞ୍ଜାଳେ ବନ୍ଧା ଜୀବନ
ହୃଦୟ ବେଦନା କେହି ତ ବୁଝେନା
ମଉଳି ଗଲା ସପନ ।
ପିଲାଦିନ ସ୍ମୃତି ସାଉଁଟି ଆଣିବା
ଗପସପ ଟିକେ ହେବା
ଆସ ମୋ ସଙ୍ଗାତ ମୋ ମନର ମିତ
ପିଲାଦିନେ ଫେରି ଯିବା ।
ପିଲା ଛୁଆ କଥା ସଂସାରର ବ୍ୟଥା
ତେଲ-ଲୁଣର ସଂସାର
ଭୁଲି ଯିବା କ୍ଷଣେ ନାରୀ ମନ ପଣେ
ତୋଳିବା ସ୍ଵପ୍ନ ନଅର।
ସେ ନଅରେ ଥିବ ଆମ କଳରବ
ମନ ଖୁସି ଟିକେ କରିବା
ଆସ ମୋ ସଙ୍ଗାତ ମୋ ମନର ମିତ
ପିଲାଦିନେ ଫେରି ଯିବା ।
କ'ଣ ରନ୍ଧା ହେବ କିଏସେ ଖାଇବ
ଘଡିଏ ମନୁ ଭୁଲିବା
ନିଜ ମନ କଥା ଯେତେ ସବୁ ବ୍ୟଥା
ଜଣେ ଜଣକୁ କହିବା ।
ହୃଦୟ ଖୋଲିବ ହାଲୁକା ଲାଗିବ
ସୁଖ-ଦୁଃଖ ଯେ ବାଣ୍ଟିବା
ଆସ ମୋ ସଙ୍ଗାତ ମୋ ମନର ମିତ
ପିଲାଦିନେ ଫେରି ଯିବା ।
ମୂହୁର୍ତ୍ତେ ଜୀଇଁବା ନିଜର ହୋଇବା
ଘର କାମ ଯିବା ଭୁଲି
ଡାଲି ତରକାରୀ ଭାତ ଆଉ ପୁରି
ଲାଗିବ ନାହିଁ ତ ଚୁଲି ।
ଚାହା କପେ ଧରି ଓଠେ ହସ ଭରି
ସ୍ଵପ୍ନ ରାଇଜେ ବୁଲିବା
ଆସ ମୋ ସଙ୍ଗାତ ମୋ ମନର ମିତ
ପିଲାଦିନେ ଫେରି ଯିବା ।
ହାଲୁକା ନିଦରେ ପଲଙ୍କ ଉପରେ
ପିଲାଦିନ କଥା ଭାବି
ନରକୋଳି ତୋଳା ମାଳତୀର ମାଳା
ସାଇକେଲେ ଦେବା ଚାବି ।
ସାଇକେଲ୍ ନୁହେଁ ଉଡାଜାହାଜ ସେ
ଦୂରେ କାହିଁ ଉଡି ଯିବା
ଆସ ମୋ ସଙ୍ଗାତ ମୋ ମନର ମିତ
ପିଲାଦିନେ ଫେରି ଯିବା ।