ସତୀତ୍ୱ ପରୀକ୍ଷା

ତ୍ରେତୟା ର ସୀତା ସାଜିଛି ଆଜି ମୁଁ

    ସିନ୍ଦୂର ଖେଳିଲା ଖେଳ

ବିବାହ ମାତୃତ୍ୱ ଲାଭ କଲା ପରେ

   ଭାଙ୍ଗିଗଲା ପ୍ରେମ ଡାଳ ।

ସ୍ୱାମୀ ମୋ କହନ୍ତି "ଅସତୀରେ ଗଣା

   ମୁଁ ଗୋଟେ ଚରିତ୍ରହୀନା

ପର ଛୁଆ ନିଜ ଗରଭରେ ଧରି

   କରୁଛି କେତେ ବାହାନା ।

ପ୍ରଥମରୁ ତୁହି ପସନ୍ଦ ନଥିଲୁ

   ଚାଲି ଯାଆ ଘରୁ ମୋର

ଯଦି ତୁ ନ ଯାଉ ବଞ୍ଚିବି ମରିବୁ

   ସୁଖ କରି ଦେବି ପର ।

ବାହାଘର ମାସେ ନପୂରୁଣ ତୋର

    ମାତୃତ୍ୱ ପଡିଲା ଜଣା

ବାପଘରୁ ତୋର ରହିଛି ସମ୍ପର୍କ

   ଭାବିଥିଲୁ ଆମେ କଣା ।

ଶାଶୂ ମୋ କହନ୍ତି "ଏଡେ ଅଲାଜୁକି

   କଳଙ୍କ ଲଗେଇ ଦେଲୁ

ଗାଁଆ ପଡିଶାର ଲୋକ ନିନ୍ଦା ଆଣି

   ଘରେ ଆମ ପୂରାଇଲୁ ।

ଯେଉଁ ଟୋକା ସାଥେ କରୁଥିଲୁ ଲୀଳା

   ସିଏ ଲୋ କୁଆଡେ ଗଲା ?

ଆଉ କାହା ପାପ ମୋ ପୁଅ ମୁଣ୍ଡରେ

   ସବୁକିଛି ସରି ଗଲା ।

ଯାହା ଛୁଆ ନିଜ ପେଟରେ ଧରିଛୁ

   ତା ନାଁଆ ଆମକୁ କହ

ତୋର ବାପା ମାଆ ସାଥୀରେ ଚାଲି ଯା

  ଏଇଠି କ୍ଷଣେ ନ ରହ ।

ଯେତେ ବୁଝାଇଲି କିଛି ଶୁଣିଲେନି

   ଅପବାଦ ଖାଲି ଦେଲେ

ସ୍ୱାମୀ ମୋ ଏମିତି ମିଥ୍ୟା କଥା କହି

   ସତ ସବୁ ଲୁଚାଇଲେ ।

ବିବାହ ବାସିରୁ ସ୍ୱାମୀଙ୍କର ପ୍ରେମ

   ଥିଲା କେଡେ ରଙ୍ଗଯୁକ୍ତ

ମାଆ ହେବା କଥା ଯେଦିନୁ ଜାଣିଲେ

   ସବୁ ହୋଇଗଲା ତିକ୍ତ ।

ନାଟକ ରଚିଲେ ମିଥ୍ୟା କଥା କହି

  ମୋତେ କରିଦେଲେ ମୁକ

ସତୀତ୍ୱ ପରୀକ୍ଷା ଦେବି ମୁଁ ସ୍ୱାମୀଙ୍କୁ

   ମେଣ୍ଟାଇଣ ତାଙ୍କ ଭୋକ ।

ବିଜ୍ଞାନ ଯୁଗରେ ଅବିଜ୍ଞ ମୋ ସ୍ୱାମୀ

   ମାଆ ହେବା ଅଭିଶାପ

ଯେତେ ପ୍ରମାଣ ମୁଁ ଦେଲେ ବି ହଟୁନି

  ଦେହରୁ ଅସତୀ ଛାପ ।