ଆଜିର ଗଣେଶ ପୂଜା

ବିଦ୍ୟା ନିକେତନ ସୁନିର୍ମିଳ ହୁଏ

ସଜା ଯେ କାଗଜ ଫୁଲେ

ଅସଲ ଫୁଲର ବାସ୍ନା ହଜି ଅଛି

ଏଇ ଫୁଲେ କାମ ଚଳେ ।

ଆମ୍ବ ଡାଳର ଯେ ତୋରଣ ଦିଶୁନି 

ହେଉଛି ଗଣେଶ ପୂଜା

ସ୍କୁଲ କମିଟି ମତାନ୍ତର ଦେଖି

ସିଦ୍ଧାନ୍ତ ନେବାରେ ବାଧା ।

ଗଣପତି ଙ୍କର ମଣ୍ଡପରେ ଭିଡ଼ି

ପ୍ରତି ଯୋଗୀତା ଚାଲିଛି

କିଏ କେତେ ବଡ଼ ମୂର୍ତ୍ତି ଆଣି ଅଛି

ସେ ଆଲୋଚନା ଚାଲିଛି ।

ଚାନ୍ଦା ଭେଦା କରି ଗଣେଶ ବସାଇ

ପୂଜାର ଆସର ଚାଲେ

ଭକତି ଭାବନା ଆନମନା ହୋଇ

ଶୋଇଛି ଭୋଜି ଭାତରେ ।

ପୂଜାର ମାହଲେ ହୋ ହାଲ୍ଲା ଅଛି

ଭୋଗ ଡାଲିଆ ର ଭିଡ଼

ଶ୍ରଦ୍ଧା ଭାବ କାହିଁ କୁଆଡେ ବୁଲଇ

ବୁଲେ ଦେଖାଣିଆ ଭାବ ।

ବିଦ୍ୟା ନିକେତନ ଦୁଇ ଦିନେ ପରେ

ଗଣପତି ଙ୍କର ପୂଜା

ହେଲେ ମଣ୍ଡପରେ ସାତଦିନ ଚାଲେ

ଯୁବକ ମାନଙ୍କ ମଜା ।

ମୂର୍ତ୍ତି ବିସର୍ଜନେ କେତେ ଆଡମ୍ବର

କାନ ଅତଡା ପଡ଼ଇ

ଶବ୍ଦ ପ୍ରଦୁଷଣ କଥା କେ ଭାବୁଛି

ଘଣ୍ଟ ତୁରୀ ଯେ ହଜିଛି ।

ପୂଜାର ମାହାଲେ ସ୍ତୋତ୍ର ମନ୍ତ୍ର ଆଉ

ଭଜନ ଜଣାଣ କାହିଁ

ଅଜବ ଗୀତରେ ଗଜବ ନୃତ୍ୟ ଯେ

ମୂର୍ତ୍ତି ବିସର୍ଜନ ପାଇଁ ।

କାନ ଫଟା ଶବ୍ଦ ଯୁବ ପିଢି ଙ୍କର

ଗୋଡ଼ ପଡୁଛି ଉଠୁଛ

ଧୂପ ଦୀପ ଗନ୍ଧ ଦୂରେଇ ଯାଇଛି

ମଦର ଗନ୍ଧ ଛୁଟୁଛି ।

ଭକ୍ତିର ନୈବେଦ୍ୟ ଆତ୍ମାହୁତି ଦିଏ

ଶ୍ରଦ୍ଧା ଅଛି ବହୁ ଦୂରେ

ନିଜର ବାସନା ପୁରଣ କାରଣ

ଗଣପତି ପୂଜା କରେ ।

ସଦବୁଦ୍ଧି ଦିଅ ହେ ଜ୍ଞାନର ଠାକୁର

ମନକୁ ନିର୍ମଳ କର

ଯୁବ ପ୍ରାଣେ ଭର ଜ୍ଞାନର ଗାରିମା

ଅଧୋପତନୁ ଉଦ୍ଧାର ।