ଆ ରେ ସାଥି ଆ

ପାଦରେ ପାଦ ମିଶାଇ ମୋର

ହାତ ଧରି ଥିବ ହାତେ

ଆସୁ ଯେତେ ସୁନାମି ଆସୁ ବା ତିତଲି

ଛାତି ବନି ଅଧା ବାଟେ ।

ଆକାଶଟେ ତୁମେ ହୋଇଲେ ମୋହର

ମୁଁ ହେବି ତୁମ ଧରା

ତୁମେ ହେଲେ ସୂର୍ଯ୍ୟ ମୁଁ ହୋଇବି ତୁମର

ତଟିନୀ କମଳ ପରା ।

ସଂସାର ଗଗନେ ତୁମେ ହେଲେ ଚାନ୍ଦ

ମୁଁ ତୁମ ନୀଳ କଇଁ

ମନ୍ଦିରେ ଦେବତା ହୋଇଲେ ତୁମେ

ମନ୍ଦିର ପାହାଚ ମୁଇଁ ।

ମୁଁ ହେଲେ ଶରୀର ତୁମେ ମୋ ହୃଦୟ

ଧକ୍ ଧକ୍ ଶବ୍ଦ ହୋଇ

ଶରୀର ମୋ ଶବ ହୋଇବା ଯାଏ ତୁମେ

ଥିବ ହୋଇ ମୋର ଛାଇ ।

ମୋ ଅନ୍ଧ ଆଖିର ତୁମେ ହେବ ଜ୍ୟୋତି

ହେବ ସେ ଆଖିର ସ୍ବପ୍ନ

ମମତାଜ ମୁଁ ଯେ ପ୍ରେମର ରାଇଜେ

ତୁମେ ମୋର ଶାହାଜାହାନ ।

ରୋମିୟ ତୁମେ ଜୁଲିଏଟ୍ ମୁଁ ଯେ

ତୁମେ ପାରୋର ଦେବଦାସ

ମୁଁ ହେଲେ ପଥର ତୁମେ ସେଇ ଶିଳ୍ପୀ

ଦେବ ମୋତେ ଜୀବନ୍ୟାସ ।

ମୁଁ ରାଈ କିଶୋରୀ ତୁମେ ଦାମୋଦର

ଏ ଜୀବନ ଯମୁନା କୂଳ

ଯେ କୌଣସି ପରିସ୍ଥିତି ଆସୁ ଜୀବନେ

ସାଥିରେ ଥିବ ତୁମେ ମୋର ।

ଦୁଃଖକୁ ବାଣ୍ଟିବା ସୁଖ ସାଉଁଟିବା

କୁ ସୁ କୁ ଗଣ୍ଠିଲି ବାନ୍ଧି

କୋଟିଏ କି ଶହେ ଯେତେ ଜନ୍ମ ଥିବ

ଚାଲିବା ହାତେ ହାତ ଛନ୍ଦି ।

ରହିଲା ରାଣ ପରସ୍ପର ହେବା ପ୍ରାଣ

"ଆ ରେ ସାଥି ମୋ ଆ"

ଆଜି ଯାଏ ଯାହା ଇତିହାସେ ହୋଇନି

ସେଠି ପ୍ରଥମେ ଲେଖିବା ନାଁ ।